立法會大選有逾178萬張選票，香港人對今次選舉相當熱心，反映愈來愈關心政治。噚日大市雖然跟住美股升，突破13100，收報13139，升135點，但成交薄弱，只得101.94億元。有經紀話，散戶留意立法會戰果而無心戀戰。
今次泛民主派攞唔到30席，應該可以消除外界對政府被立法會癱瘓的憂慮，不過今次長毛入會，似乎會增加中央與泛民主派人士的溝通困難，老友都話將有好戲睇。
金勞詹以高票數當選重返立法會，唔單止支持金勞詹的選民高興，連支持佢嘅股民都相當高興，因為與金勞詹有關的股票都急升賀佢一賀，其中駿雷（070）升25%至0.015元，搞到要發出股價異動聲明；北方興業（736）升16.67%至0.014元；信用卡防盜（1051）則只升1.42%至0.071元。
中國8月份通脹率高企於5.3%，與7月份相若，市場又有人敲中國加息的警鐘，不過中資股反應唔大，國企指數仍升0.15%，收報4293。據聞國內好多企業寧願中國加息，都唔好繼續現時的宏調措施，因為在現行政策下，幾乎只有國家支持的重點企業才可以借到錢，其他民企就算肯畀高息都未必可以借到錢周轉，其實現時的宏調政策比加息更辣，但唔知點解外界擔心加息多過宏調。
思捷（330）上周被花旗唱好要見44元後，噚日借勢造好，一度突破40元再創新高，高見40.20元，收報39.40元，升5.35%，成交達1.1億元。
阿虎