昨日是2004年立法會選舉投票的大日子，一班藝人包括容祖兒（Joey）、元華、古巨基、楊思琦、李永豪、Boy'Z、林建明及夫婿曾展章和張堅庭等，紛紛一盡公民責任往投票。但身為選民多年的元華，昨日與太太到達票站後竟被拒投票，令他甚為氣結。
元華多年來均積極參與投票，身為新界東選民的他昨日下午約二時，偕同太太齊到西貢鄭植之中學準備投票，但有工作人員指有關方面早前曾寄信通知元華成為抽樣調查目標，但他卻一直未有回覆，故被剝奪投票資格。元華昨日返回將軍澳電視廣播城為無綫新劇《肝膽崑崙》開工時，提到未能投票一事仍怒氣沖沖。
「連白票都冇得投」
元華說：「我唔明我點解冇得投票，我好多年前已經登記咗做選民，之前都試過投票，點知佢哋話寄咗封掛號信抽樣調查我，又話我冇回覆，其實我都冇收過，我哋做呢行成日唔喺香港，但唔代表我唔喺嗰個地址住，我太太都係同我住同一個地址，但係佢就可以投票。嗰個大法官胡國興叫人投白票，𠵱家我連白票都冇得投。我打過去投訴但係冇人聽，打去選舉事務處就同我講話攞身份證去就得，唔使帶投票通知書，我建議政府下次不如叫人帶差餉單去投票，政府啲人真係多乜餘，正式食塞米。」
至於身為港島區選民的容祖兒，昨午約一時半在兩名保鑣和助手陪同下抵達跑馬地票站，Joey說：「今次係我第一次投，之前我都諗咗一段時間投邊個，又問咗媽咪同朋友意見。希望區內治安可以更好，如果趕絕埋狗仔隊就最好啦。今日我一起身就嚟投票，一分鐘都唔使就搞掂。」
吳日言信任余若薇
同是港島選民的吳日言和Boy'Z昨分別往西灣河和灣仔票站投票，吳日言說：「我爹哋有份協助安排投票嘅工作，所以我唔係好方便同佢商量，我投咗余若薇，因為社會進步咗，女性有獨立自主權利，希望第時佢哋可以為市民爭取更多福利，幫到班老人家啦。」而Boy'Z成員Steven則說：「第一次投，感覺大個咗，而且五分鐘就搞掂，好簡單。」
而新界東選民古巨基昨日下午約三時許往沙田保良局蕭漢森小學投票，該小學正是基仔的母校，他說：「我幾年冇返母校，以前我哋有間屋喺呢區，間屋一直冇賣到，所以我投票都係去番呢區投。我睇完候選人政綱之後都有同家人商量，但大家取向唔同，各有各投，我哋屋企好民主。我今年係選舉宣傳大使，噚日我都打咗成一百個電話叫人積極投票㗎。」基仔昨日在票站現身時一度引起哄動，頻頻被人要求簽名和合照，就連在票站外做問卷調查的女工作人員也放下工作，拉着基仔合照和簽名。
張堅庭亦是新界東選民，昨日約十一時他便到達坑口票站，原來他早前在內地工作時遺失身份證，故昨日他帶備特區護照往投長毛梁國雄一票。張堅庭說：「我覺得長毛幾好玩，佢見證咗香港嘅遊行文化，係要搵啲人行出嚟令香港政府百花齊放。其實文化藝術同體育應該分開，霍震霆我都唔識佢，我都唔明文化藝術同體育有乜關係，會同一個功能組別。」
功能組別揀張文光
至於楊思琦與男友李永豪分屬九龍西和新界東區，所以昨日二人分道揚鑣各自投票。李永豪昨晚約七時由母親施明駕車接載往西貢中心小學票站，他透露今次投了曹宏威一票。李永豪說：「我喺公司見過佢，覺得佢係做到嘢嘅人，由於我對其他人嘅政綱唔熟，所以都係投熟人好啲。」
而思琦傍晚約六時與母親抵達大坑東社區中心票站，她透露因自己是師範畢業，除直選外還可在功能組別投票，思琦說：「功能組別我投教育界嘅張文光，但直選方面就唔方便透露，希望選出嚟嗰位將來可以幫街坊做更多嘢啦。」
沙姐林建明與夫婿曾展章同樣是九龍西選民，二人結伴到九龍塘票站投票時，表示覺得今年投票反應較過往熱烈。沙姐說：「我心目中嘅人選唔喺呢區，但又唔想投白票，所以冇得揀之下揀咗其中一個。」
採訪、攝影：卓美娟、卓寶花、馮美茵、張俊銘、陳月萍、王崇穎
