呢排香港都幾多好消息「出籠」，好似地產商勾地（證明地產商對地產市道有信心）、中國奧運金牌運動員訪港、失業率回穩、經濟回復通脹等等。
其實，政府財赤問題一日未解決，普羅市民以致社會福利機構都要勒緊肚皮過日子。蘋果日報慈善基金一向取諸社會，用諸社會，除咗協助困難家庭度過經濟難關之外，每年亦都會有四次大型撥款行動，資助社會服務機構推行切合社會需要嘅服務計劃，以填補政府資助不足嘅空隙。
蘋果基金本年度第三季資助社會服務計劃嘅申請已經喺較早前截咗止，共收到四十六份申請書，計劃內容包括失業人士就業支援服務、團年飯、長者牙科護理及健康檢查、單親家庭服務計劃、新來港人士互助計劃、社區扶貧等等，活動多元化，迎合草根階層唔同嘅需要。
大使已經密密處理緊呢批計劃書，希望盡快提交畀愛心基金委員會作進一步審核，預計下個月初會有結果，申唔申請到資助嘅機構都會收到個別通知㗎！
暖流熱線
電話：29908688
傳真：23702192
電郵：
網址：