E-kids攻陷女生宿舍
馮仁昭四圍超：Tommy、Macy拍拖睇戲

女生宿舍成員Macy入行冇耐，就憑住甜美嘅笑容，俘虜咗E-kids成員Tommy嘅心，上周五記者就發現Macy同Tommy相約喺銅鑼灣睇戲。
當日Macy做完嘢，就會合Tommy去JP銅鑼灣睇戲，沿途見佢兩個有講有笑，都幾親密。去到戲院售票處，只見Tommy問Macy一輪嘢，似乎係睇吓女方想睇乜戲，但最終都冇買飛，而去咗隔籬買爆谷。之後Tommy同Macy發現記者，表情好愕然兼且好似好尷尬咁，問佢哋睇乜戲，Tommy話：「我想去睇《異獸戰》，佢（指Macy）睇過，佢陪我睇啫！」

冇例牌否認
記者直接問佢哋兩個係咪拍拖，以為佢哋會例牌否認，點知佢兩個只係笑，Macy重話：「我都識Alan同Nick（E-kids另外兩名成員），我都係見朋友想睇戲先陪吓佢（Tommy）啫﹗」之但係點解只得佢兩個？Macy嘅理由真係好牽強喎。

霆鋒同全智賢拍劇？
謝霆鋒同全智賢將會喺年底合拍內地偶像電視劇《幸福快車》？馮仁昭噚日喺網站見到呢單消息，話套劇年底喺北京同成都開拍，重係《流星花園》嘅導演蔡岳勳執導，內容骨幹係講模特兒，霆鋒同全智賢嘅感情線重有少少搞笑㖭。不過馮仁昭分別問過導演同霆鋒經理人，大家都話冇呢單嘢，咁即係流㗎啦。

森美自封港版曉格蘭特
森美、梁漢文、阮小儀同EO2前晚喺總統戲院宣傳新片《甜絲絲》，身為男主角嘅森美自言冇留意票房，但知道新片票房壓倒西片《異獸戰》後就好開心咁話：「盡力就OK，冇一炮而紅嘅，要浸㗎嘛。」
之後森美竟自稱有人指佢係港版曉格蘭特（HughGrant），佢亦會朝呢個目標進發咁話喎！

李麗珍外地返港
身兼Headquarters股東兼髮型師嘅馬桂燦（JackyMa）俾人入稟申請破產，JackyMa同李麗珍嘅新聞早排炒到咁熱，之後珍妹就返咗內地宣傳。
噚日下晝珍妹喺外地返港，之後坐住StarEast嘅保母車返碧瑤灣寓所，有一個助手同佢同車，佢落車時重戴住黑超。