勾地消息突然空降，益咗啱啱推盤同賣緊貨尾嘅發展商之餘，亦幫唔少投機者甩難。差啲變成近年少有蝕讓盤嘅油麻地窩打老道8號，市傳月底可以交樓入伙，吸引唔少但求方便想喺市區搵新樓嘅客問價，幾個單位成功易手，有賺有蝕。
好似二座高層G，五百四十呎，成交二百三十萬，蝕咗兩萬，都算執番身彩。
至於賺錢個案，係今年初買入，二座高層A，五百七十呎，成交價高啲啲，約莫二百三十八萬，賺咗十四萬，計埋使費，只算微賺。
中記劉偉邦話，窩8呎價三千七至四千，停留喺三、四月水平，個市升緊，而窩8又最快月底收樓，於是引嚟一批年輕上車客問盤，睇樓激增兩成。
簡化內地民企來港投資嘅民企自由行公布咗幾日，長實東涌悅濤軒，率先食住熱門話題，計劃趁十一國慶黃金周長假，組民企訪港睇樓團，翻炒去年興起嘅自由行睇樓團老橋。
不過，今次嘅對象唔單止廣東省地區旅客，而係北京、天津一帶有實力嘅民企。長實郭子威話，初步聯絡咗有關部門，計劃組十團，每團二十至五十人，來港投資之餘，順道睇樓，發展商免費提供法律同按揭諮詢服務。
估計呢類民企自由行睇樓團，短期內成為各大發展商同代理搞記招嘅熱點。
樓市又再好轉，過江龍都掃貨。美記鄭兆康話，有個台灣家族基金，一口氣買咗五個西半山雍慧閣單位，涉資三千五百萬，每呎七千幾，打算長線收租。
新世界黃浩賢話，買家喺香港做生意，星期六下晝喺台灣派人攞票嚟香港。佢重話，𠵱家重有三個本地客大手洽購，最多傾緊十間，涉資七千萬。
雍慧閣今個月二十號之後公開發售，計劃加價三至五個巴仙。
又有代理高層，投樓市信心一票。美記六名高層，噚日一人買一間西灣河嘉亨灣，包括主席黃建業太太、董事朱德朗、中半山豪宅高級經理何銘培，重有上周剛紮職嘅副主席張錦成、住宅部行政總裁陳坤興，以及港島區董事伍創業。聽講，三個因為升職，所以買嚟獎勵自己。
陳坤興話，佢買入六座高層G，唔使四百萬，諗住收租或者度假。至於張錦成，都係買咗六座高層G室。
過時過節，係經濟氣候探熱針，從公司互送節令禮品多寡，就知個市好唔好。
今年中秋月餅銷量同埋送贈，應該一定好過舊年。
就以美記為例，佢哋由○二年開始，同美心集團合作，出美聯月餅，舊年員工訂購不過千零盒，今年已經突破二千。訂購特別多嘅分行，有銅鑼灣同屯門分行，一次過訂咗超過八十盒，自用同送畀客戶都有。
蘭西
電郵地址：
