選舉之前，特區政府到處打鑼宣傳，鼓動市民投票。好多人都奇怪：投票率愈高，愈對呢個廢柴政府不利，董班子再蠢，都唔會冇咁嘅常識，點會咁好死想香港人多多投票，唔通即是想多啲人七一遊行？
結果市民真係踴躍投票，董政府果然搞出一啲濕滯嘢，多個投票箱出現人為嘅阻撓投票小動作，包括羅便臣道英華票站地方太細，人手不足，選票滿瀉，「工作人員」竟然就地停止投票，叫選民企喺處等。
董政府唔知係唔係一聽見投票率節節推高，終於心慌上嚟，即時放暗器、布地雷，企圖拖延時間，阻撓選民投票支持民主派！
咁多個月來，胡國興大法官時時出嚟指指點點，以高等華人及青天大老爺自居，一時又叫選民投白票，一時又話呢樣限制拉票、嗰樣唔准喺傳媒提咁多候選人個名以示「平衡」，好似永遠只有佢執法最嚴明、最知道乜嘢叫民主。
原來呢位胡官講就天下無敵，做就冇心乏力，票箱細，即是根本冇預到咁多人出嚟投票喇！
其實佢近期講嘢到咗語無倫次嘅地步，竟然叫人「投白票」抗議亦可以。投白票浪費資源，有乜好「抗議」？兩年七一，共一百萬人次大遊行，抗議重未夠？胡國興滿口廢話，最識就係吹毛求疵度住候選人肖像尺寸。選票就叫人對摺一次，A4紙咁大張，摺一摺放落箱，就梗係嘥位，好似胡官佢咁大隻，佢搭飛機，都識得避免搭EY經濟位，係咪？
喺肥彭時代，胡官經已係主管選舉，嗰陣時佢傍住肥彭四圍行。跟隨殖民地主人咁耐，咁都學唔到嘢，加埋個林公公，大罵美國「干預內政」就八股說話講到足，選舉行政管理一塌胡塗，重話香港民主有「進步」。冇錯，香港人民主意識有進步，不過呢個無能政府就回塘退步！
傳真︰2623-9278
電郵︰