上周五港股全日高收，夜晚美股又係低開高收，油價上周五回跌，有利港股。
滙控C輪：個市若然再上番去，最重磅嘅滙控（005）唔會冇份。滙控上周收122.50元，全周升50仙，全周最高123.50元，遲吓破位機會好大。上周五，紐約ADR滙控收78.89美元，5股等於1股本港滙控，折合123.07港元，較港市為高。當晚ADR最高見79.13美元，創新高，而成交，折合本港滙控306萬股（本港成交亦只係863萬股），大增4成，呢啲市場數字，似係說明滙控有勢，等候更上一層樓。
滙控有得睇，滙控C輪揀嚟炒，以前講過好多隻，例如想搏殺，向9876埋手，因為隻輪24.7倍槓桿率勁爆。唔想炒出炒入揸耐啲則揀2155，貪佢明年4月初先至夠期，夠長命。
今日新加入推介嘅係9772，冇9876咁搏殺，但爆炸力則強過2155唔少。9772壽命唔算短，12月中到期，輪價87仙，溢價0.1%等於平水，而槓桿率14.1倍則唔細，因為平水之故，有效槓桿率亦非常高，達11.7倍。條數係咁計，正股郁1元，隻輪郁14%。
和黃C輪：和黃（013）上周五回穩，和黃C輪可吼實短炒。9780本來係熱門對象，但夠鐘期近，交投唔多，2157成為新對象。2157明年1月到期，輪價68仙，溢價2.1%，槓桿率9倍（有效6.7倍），引伸波幅26.5%，呢隻啱短炒，和黃另外好幾隻C輪，槓桿率勁好多，但要畀多啲溢價，炒高溢價輪要計埋風險。
章盛