昨日立法會選舉，小初雖然對個個候選人都唔多鍾意，但為盡公民責任，點都要投一票。選舉一事，有唔少人都覺得對大市有影響，但有乜影響又講唔出。
小初問經紀陳今日炒乜股？經紀陳居然推介修身堂（8200），佢話隻股今日將復牌，並收到料話有關人等對修身堂新簽的項目寄望甚殷，有人一早摩拳擦掌，想借消息炒一轉。隻股停牌前報0.60元。
修身堂在9月3日股價突然急升兩成幾，高見0.63元，公司當時話正商討多個消費品項目，同埋有董事行使認購權，之後修身堂就一直停牌。原來修身堂今次與天峰國際同上海東紡寶潔產品專營合作，組合營企業上海東紡寶潔產品銷售有限公司，並佔合營企業51%股份。
經紀陳話，呢間合營公司將在華東分銷包括一隻在香港熱賣，有好多女明星做代言人的化妝品及皮膚護理產品。據講有人覺得能夠簽到呢隻牌子的代理權實在難得，有無限商機，可以成為炒賣藉口。
經紀陳又話，由於修身堂街貨唔多，要炒上難度唔大，但跟風就要識睇位落車。
慕容小初