話咁快歐冠盃正式賽事又喺周二開始，其中香港球迷可以免費喺電視睇到嘅其中一場直播，就係蘇超聯球隊些路迪主場對西甲聯勁旅巴塞隆拿；就算兩隊陣前都有傷兵，呢場大波都算係萬眾期待。
由於兩支球隊都崇尚進攻足球，而些路迪喺主場踢歐洲賽又特醒，拉近咗同星光熠熠巴塞隆拿嘅距離，呢場波重係巴塞嘅瑞典前鋒拿臣回歸些路迪嘅首仗，認真有睇頭。不過，經過上星期六嘅賽事，就兩軍都添傷兵。些路迪除咗有中堅華加受傷，前鋒瑟頓嘅鼠蹊傷亦未好番，未必趕及喺星期二上陣，同前拍檔拿臣鬥過。
巴塞方面，就有巴西中場莫達喺對西維爾時勇戰受傷，左膝兩條韌帶都斷裂，起碼要唞六個月。雖然莫達唔算出名，但其實自從高古同戴維斯離隊之後，佢就幾乎係巴塞唯一可以踢防守中場嘅球員，唔怪得連巴塞教練列卡特賽後都話頭痛。
過去成日對曼聯入波嘅路倫，前晚又幫保頓省入對方大門。呢場波曼聯都算執番身彩，臨完場扳平，但入波前貝利安有犯規之嫌。呢次係曼聯今季第三次因問題球（和愛華頓○比○，施維斯達犯手球無被吹；和布力般一比一，阿倫史密夫入波前沙夏犯手球）。曼聯咁有運，點敢睇小？
睇完前晚基爾禾對國際米蘭場波後，我求大俠對基爾禾新帥巴利達留下深刻印象，理由並非佢首次領軍就對國米搶到分，而係俾攝影機捕捉到佢兩度挖鼻，幾唔衞生。睇得一場波，好難咁快評估佢領軍能力同前教練迪尼利有無得比，但儀態就肯定唔及成個學者咁款嘅迪尼利嘞。
前晚孖膽投注額得一百三十幾萬，係近期新低。睇近期走勢，原來當嗰日比賽場次多，孖膽投注額就少；相反比賽少，孖膽投注額就多，例如前個禮拜五得兩場國際賽嗰一口、月頭由兩場英冠組成嗰一口都係咁。當比賽多，波友玩其他投注項目都玩唔切，押注孖膽意欲自然少。
新加盟愛華頓嘅澳洲國腳中場卡希爾，喺上星期六贏曼城一比○嘅聯賽當中，就做完英雄做狗熊。事緣佢喺五十八分鐘為愛華頓奠勝，可惜之後因為將件波衫拉高至頭部慶祝，球證認為佢慶祝方式過激，罰佢黃牌，兩黃一紅被逐；結果要喺下仗停賽，下次記住唔好咁興奮喇！