荷李活女星嘉芙蓮薛達鍾絲（CatherineZeta-Jones），最近同拉丁情聖安東尼奧班達拉斯（AntonioBanderas）去咗墨西哥拍攝電影《黑俠梭羅》續集《LegendOfZorro》。不過嘉芙蓮日前喺當地差啲俾全副武裝嘅大盜綁架，雖然最後都有驚無險，但嘉芙蓮就嚇到三魂唔見咗七魄。
據英國《太陽報》報道，嘉芙蓮日前喺墨西哥城以北、罪案率極高嘅聖路易斯波托西市拍完戲收工後，由保鑣揸車接返酒店，喺公路上突然被載住四個賊人嘅賊車從後跟蹤伏擊。
據講當時賊人用槍指嚇嘉芙蓮車上嘅司機，要佢駛出公路，諗住綁走嘉芙蓮，好彩喺混亂之間，坐喺另一架車度嘅電影公司保鑣將賊車驅趕，嘉芙蓮先逃過大難咋！
為咗將匪徒繩之於法，電影公司保鑣窮追賊車，警車亦加入追截行列，重成功將賊車截停，警方發言人證實車上面嘅四名持槍賊人，全部被拘捕。
呢輪嘉芙蓮真係唔好彩，佢俾米高德格拉斯（MichaelDouglas）嘅狂迷恐嚇件事未平息，又幾乎俾人綁架，雖然今次嘉芙蓮有驚無險，但據講佢喺事發後嚇到儍晒，唔知嘉芙蓮嘅老公米高德格拉斯有冇即刻飛去墨西哥安慰佢呢？不過《黑》片重要喺聖路易斯波托西市度拍到聖誕，睇嚟嘉芙蓮有排驚！