路訊通（888）喺嚟緊嘅星期三公布04年中期（6月止），博有好業績，買定「發發發」。路訊通今年頭5個月收入，已經同03年下半年與沙士期後、香港經濟急速大反彈之時睇齊，即係話，路訊通今年上半年繼續受惠大圍環境，收入已經回復正增長，生意做多咗。
03年中期，路訊通俾沙士搞到冇啖好食，虧損2620萬元，當中重包括為應收帳撥備高達1400萬元，今年市道復甦，照咁睇，恐防客戶拖數呢支歌仔唔會再翻唱，04年中期毋須撥備，一來一回，講緊1400萬，04年上半年虧轉盈，有望。
呢期纖體瘦身大行其道，最近所見，RoadShow播多咗纖體或者係健美食品廣告。講真句，纖體行頭競爭唔細，為求出位，廣告宣傳唔慳得，呢一點，正好有利於好似RoadShow呢類流動多媒體企業。食住呢個勢，路訊通財路自然通。
路通訊呢兩個幾月，喺0.8元至0.88元兜咗個圓底，只待好消息配合發力，業績前，要昅住。
本周第二件係JOYCE（647）。講真句，JOYCE現價PE21倍，唔係便宜，但重推介，又講兩點。第一，呢期市場焦點又集中返零售企業，特別近黃金周之時，JOYCE嘅PE係貴，但份屬零售股，有概念。第二，主席係馬景華，但大股東則係會德豐（020），有大孖沙做控權股東，身價同日後業務聯想，可以好遼闊。純睇勢，隻股突破到0.48元最近半年橫行頂，可以海闊天空。
錢雋