今日是2004年立法會選舉投票日的大日子,五區候選人早前已各出奇謀大力拉票,望為自己在立法會爭得一席位,而不少娛樂圈中人今日均會一盡香港公民責任,群起出動參與投票,支持自己的心水候選人。
身為今屆立法會選舉宣傳大使的容祖兒及古巨基昨日均作最後衝刺,大力呼籲全港選民踴躍投票。而港島區選民關心妍昨日更公開表態,揚言支持泛民主派的余若薇;至於新界東選民張堅庭則力撐「長毛」梁國雄,表示今天會投他神聖一票。
採訪、攝影:朱倬誼、戴彩煥、林妙萍、張俊銘
張堅庭: 我係新界東選民,會投長毛(梁國雄),我好支持泛民主派,因為佢哋啲政綱同我嘅思想差唔多,都好獨立同冷靜。我聽日(即今日)會一早去坑口票站投票。
關心妍: 我係港島區嘅選民,我支持民主派議員,特別係余若薇同何秀蘭。我雖然有好多嘢做,但係都會抽時間去投票,我哋應該盡公民責任,選出自己鍾意嘅人,幫香港做事,聽日(即今日)係星期日,大家唔好懶,希望喺投票站見到大家。
楊思琦: 我廿一歲已經登記做選民,因為我覺得呢個除咗係市民嘅責任之外,選一班做到嘢嘅人出嚟做嘢,咪即刻幫番自己,我爹哋、媽咪同哥哥都係選民,由於我近排工作都幾忙,冇乜時間留意候選人嘅政綱,以及上屆嗰一班究竟做得好唔好,所以會同屋企人商量一吓選邊個先投票。
汪明荃: 我想呼籲大家應該為自己嘅香港政制盡一分力,但當然投票之前大家要諗清楚,有邊個冇誠信,係咪講一套做一套,係咪只係識得搞是搞非?大家要好冷靜分析,舊嘅做得唔好,係咪要搵新嘅入嚟?又要睇埋平衡,一張票數分分鐘影響晒成個大局,所以一張票都好重要。
古巨基: 我都呼籲大家去投票,正如我拍嘅宣傳片,成日提醒自己要去投票囉,我呢排見親啲朋友,都提住記得912呀。希望我心目中嘅候選人當選之後可以爭取長者同兒童嘅福利。
黃耀明: 《人山人海》呢首歌係講人與人之間嘅團結力量,我都希望大家可以去發揮全民力量。
容祖兒: 我覺得要支持吓投票,我都將啲工作延遲少少去投票先,希望大家都盡量抽時間投票。
賭王四姨太梁安琪: 我會盡吓公民責任,揀邊個都未定,再睇吓啲政綱先。
Boy'Z: 我哋兩個會一齊去投票,希望嚟緊選到嘅議員可以推行良好嘅教育,𠵱家有咁多雙失青年,社會應該畀年輕人多啲就職同培訓機會,不過啲人成日培訓又培訓,冇乜實習機會,有多啲實習機會會更加好。