今日投票，如果支持民主，擁護自由，除咗要選港島李柱銘，就要畀多啲有獨立個性嘅人入會，今日投票最後貼士，為咗顧及平衡，有一位高人話，佢未必會叫人投晒民主派囉，不過要實現立法會嘅獨立人格，就一定要投票將「四大惡人」齊齊送入立法會。
邊四大惡人？第一個，就梗係九龍東鄭大班。大班俾黑社會恐嚇封咪，但轉戰立會復咪，為咗維護一把有吉屎嘅聲音，九龍東選民，一定要選大班，畀佢帶埋陶君行入局，培養後俊。
第二個就係新界東長毛梁國雄。官商勾結，民不聊生，係時候有一個為無產階級請命嘅街頭青年革命家入局，選長毛，就係紀念毛主席九月九日死忌嘅最愛國行動。
第三個就係金融服務業潮州怒漢詹培忠。佢飽受港英及老董迫害，本港潮汕人士為數百萬，冇一個代表唔似樣，今次翻閹立法會，當然有助同潮州佬爭光。
第四個就係旅遊業謝偉俊。佢最近遭人抹黑，又話佢係旅遊業外行，卒之京官都睇唔過眼，即時由中國旅遊協會出面邀請佢選後訪京，商討香港旅行社入大陸嘅利益，包括點樣收爛數嘅問題。咁嘅突破，無形中等同當年老江爭住同阿董握手嘅象徵意義，一向愛國愛港嘅旅遊業收到未？
四大惡人一齊報到，今年立法會就會多姿多采，同啲悶死人嘅庸才大清場，記住投票選四大惡人喇！
傳真︰2623-9278
電郵︰