久未在台上一起演出的達明一派，前晚舉行拉闊音樂會，當劉以達唱出首本名曲《排名不分先後左右忠奸》時，更掀起了高潮。黃耀明表示他們經常唱舊歌，幸《排》歌提及的人名仍未out得晒。
達明一派自九六年起就沒有再合作演出，前晚他們終於重組舉行拉闊音樂會。一班「人山人海」成員如at17和PixelToy等獻唱達明一派的《馬路天使》和《Kissmegoodbye》等經典金曲作前奏後，黃耀明和劉以達便出場，引來全場哄動。
音樂會舉行期間，有不少歌迷站在椅上欣賞，氣氛熱烈。梁漢文、劉浩龍、何韻詩、陳文媛、楊千嬅和明哥的男性好友均到場支持。當劉以達唱出其首本名曲《排名不分先後左右忠奸》時，引來全場觀眾歡呼和掌聲，見觀眾反應熱烈，阿達更乘機呼籲樂迷十二月時買票支持達明一派演唱會。
事後劉以達表示在開騷前一度失聲，他說：「我一早起身把聲沙晒，嚇到我死死吓。重有我差啲甩褲，因為有部機夾住我個籮柚，部機又重，係咁聚住我條褲，搞到我要成日掹住條褲。」達明一派又透露下星期開始會積極寫新歌，來應付年底舉行的演唱會，明哥說：「我都覺得唔可以成日都係唱晒舊歌，好似阿達嗰首《排名不分先後左右忠奸》咁，有啲人名都out咗，好彩鄧小平今年一百歲冥壽都out唔晒。」
問達明一派考慮邀請甚麼嘉賓演出？明哥笑言希望邀請樂壇所有二人組合如Twins、Boy'Z和ILoveYouBoyz；劉以達則搞笑地表示希望能請Isabella（梁洛施）任嘉賓。
明哥覺得就算演唱會沒有嘉賓，都會賣座，他說：「我從來都冇擔心我哋演唱會冇人睇，因為我知道一直有一班好忠心嘅歌迷，同埋我哋嘅歌都有排唱。」
採訪：李珮洳
攝影：何國豪
