《金枝慾孽》的徐公公，老謀深算，但觀眾印象最深刻、最懷念的，應是扮嘢出神入化、令人笑到失禁的盧海鵬。一代扮嘢天王盧海鵬，給大家留下很多難忘的回憶。
近日無綫推出早年《歡樂今宵》藝員齊齊扮嘢的《金像獎歌曲頒獎典禮》VCD，讓觀眾重溫盧海鵬爆笑的扮嘢演技，無論扮羅文、張國榮、達明一派的黃耀明、盧冠廷，抑或反串扮葉德嫻、沈殿霞，盧海鵬的舉手投足也令人笑破肚皮，就連肥姐沈殿霞早年見到盧海鵬扮自己愛女欣宜時，也控制不住笑到失禁。
原來，盧海鵬首次扮嘢演出，是於《歡樂今宵》中扮盲俠勝新太郎，而當時好評如潮，更奠定了他的扮嘢天王地位。究竟，在芸芸扮嘢角色中，哪一個是盧海鵬滿意之作？他說：「個個都差唔多，冇乜邊個特別鍾意，係扮阿肥（沈殿霞）最印象深刻，因為扮佢最辛苦！我扮張惡榮，至多係戴腰封束吓條腰，但扮阿肥就唔同，我頭一次扮佢，因為買唔到佢咁大size胸圍，惟有捉埋導演上佢屋企摷胸圍用。「當其時阿肥唔喺屋企，佢亦唔知我咁做，佢工人知我嚟摷胸圍之後，就好驚咁話：『唔得㗎，小姐返嚟會鬧㗎。』但我同阿肥好熟，所以冇理咁多，自己入房摷。不過，阿肥上圍咁勁，我塞兩嚿廁紙都唔夠，重要加好多布碎，成晚做節目俾心口呢兩嚿嘢頂住，辛苦到唞唔到氣，返到屋企重胃痛㖭。」
當大家以為盧海鵬扮嘢功夫如此了得，想必事前一定做了許多工夫時，他斷然否認：「以前邊有咁多帶畀你睇，全部都係靠自己平時睇乜都收收埋埋，記低喺腦入面。扮嘢最緊要有笑料，扮到十足十係冇用，只要你將某個人一啲特徵或者小動作誇張少少，觀眾一睇已經知你扮緊邊個。」
近年無綫扮嘢節目幾乎消失得無影無蹤，不少人大感可惜，但盧海鵬卻有另一番見解：「冇乜可唔可惜，好多嘢要各方面配合，公司唔肯再搞呢啲節目，因為扮嘢太多顧忌，郁啲又俾人話影射俾人告。而且以前每一個歌星都有佢嘅特色，扮佢哋觀眾會有共鳴，但𠵱家嘅好似個個都差唔多。」
經常被委派扮嘢，難道不感厭倦？盧海鵬說：「扮一次就唔厭，但扮嚟扮去都係扮同一個人，觀眾都冇新鮮感啦。好似當年成日要我扮羅文，冇point都要扮一餐，扮到羅文話要畀律師信告我，當然佢只係開玩笑啫，後來重搵埋我登台㖭。」
今年六十二歲的盧海鵬，一九七○年由內地偷渡來港，七三年投考無綫第三期藝員訓練班，跟周潤發、吳孟達、林嶺東和鄧英敏是同班同學。盧海鵬從小就對演戲有濃厚興趣，在內地曾擔任文工團團長，他最欣賞的影星，是《碼頭風雲》和《拿破崙傳》的洛史德加（RodSteiger），而他演戲啟蒙老師，原來正是周星馳在《喜劇之王》中醉心研究的「俄國戲劇大師」史坦尼斯拉夫斯基（ConstantinStanislavsky）的著作《演員的自我修養》。
盧海鵬笑說：「本書成幾吋厚，我用嚟當埋枕頭。史坦尼斯拉夫斯基有佢一套『方法演技』理論，估唔到後來我讀無綫訓練班，又係攞呢本書嚟教，我梗係扮唔識未讀過啦，費事喺成班同學中鋒芒太露，總之每個階段及格過到關咪算囉。」
雖然近年難再有機會見到盧海鵬扮嘢演出，但在電視劇和杜琪峰電影中，仍可見到他的影蹤，如《ＰＴＵ》和《柔道龍虎榜》等等，莫非盧海鵬變成杜琪峰的愛將？盧海鵬笑着否認：「阿杜係無綫第四期藝員訓練班畢業，我識佢好耐，以前佢都有搵我拍戲㗎啦！時間啱嘅話，邊個搵我拍都得㗎。」
現已兒孫滿堂的盧海鵬，早年因為患上糖尿病而體重急跌，記者問他何不退休調理身體，享受一下兒孫福時，他笑說：「好多年前我已經諗住退休唔做，我曾經試過冇做嘢成年㗎，但我又唔打牌又唔賭錢，生活真係好悶，後來何麗全打電話畀我叫我返無綫，話余子明都返嚟做，咁我咪返嚟囉，幾十歲人叫做有啲寄託啦。」
撰文、攝影：戴彩煥
