701收料站:南海石油勿憧憬

701收料站:南海石油勿憧憬

在911前夕,大市觀望氣氛濃厚,成交縮減係相當正常嘅事,希望呢個周末平平安安,下個星期又炒過。
上個星期勁跌後停牌,在本周一復牌大反彈嘅南海石油(076),在熱鬧過後走勢反覆向下,噚日一度低見0.53元,收0.57元,跌8%,成交股數4222.8萬股,金額2554萬元。
經紀陳話,江湖傳聞原來的幕後炒家,在危機重重的情況下,終於成功散貨鬆人,而能夠獲利的原因,據講係因為捕捉到散戶高位唔肯追,低位先至肯跟的心理。
話說南海石油上周一度勁跌近九成後停牌,之後又神奇地在本周一復到牌,之後由低位0.37元升過最高1.40元水平,跟住連續兩日企在0.9元水平。
由於復到牌兼夾股價勁升,令唔少人以為今次有料到,所以紛紛撲入博反彈,博股價重上1元水平,據講幕後人即刻乘機散貨走人。
經紀陳表示,南海石油未來或有反彈,但因為貨源都已經散到一街都係,所以反彈幅度唔慌大,時間亦唔慌長,叫小初無謂再作憧憬。
慕容小初