聽日立法會投票，中方成日話怕泛民主派會取得大多數，其實泛民主派盡晒全力，喺呢個選舉制度下，最多只得二十五至二十六席，如果你我唔去投，就更加地位不保；要多一至兩席，就要人人都踴躍去投票。
按中大民調計，𠵱家泛民主派喺功能組別頂多取五席，就係張文光、吳靄儀、單仲偕，加埋衞生服務界以及社會福利界。至於直選，港島四席、九西三席、九東三席、新西五席、新東五至六席，即坐二十望二十一。
張文光話，接二連三嘅負面新聞影響最大係第二梯隊，原本佢哋希望陳家偉，胡志偉同張賢登可以選到，𠵱家就冇乜希望，於是選嚟選去都係舊人，大班、長毛，梁家傑同湯家驊會係新力量，黃成智分分鐘不保，所以愛民主自由嘅人，聽日一定要投票，趕走保皇黨。
法例規定十八歲先有資格登記做選民，多數中學生雖然未夠秤投票，但已經好有公民意識，尤其係屯門中華基督教會譚李麗芬紀念中學嘅學生，皆因呢間學校日前搞咗個中學生模擬選舉，所有學生快全港選民一步，已經投咗票，結果噚日已經登咗喺港聞。
立法會選舉喺後日就有結果，校方打算當日發動啲學生響應郵政署嘅「愛與關懷日」，寫封信畀新界西各候選人，贏咗嘅就恭喜佢，輸咗嘅就安慰吓。
傳真︰2623-9278
電郵︰