惡勢力迫害民主派又進一步，繼大班被阿伯班馬謾罵追打之後，親中暴力再升級，民主黨黃成智喺上水拉票，助理遭到一名阿伯拳打牙骱，黃成智想調停，點知亦遭橫腳飛踢！
咁嘅所作所為，就係要散布赤色恐怖，向市民挑戰。今日拳打腳踢，明日就可以槍擊斧劈，劉慧卿住宅被爆竊、梁耀忠辦事處被潑屎、司徒華維園遭追打，全部不了了之，呢啲就係警方長期縱容間接做幫兇嘅惡果，難為胡官重問人點解唔報警。
香港今日漸漸淪為一個「愛國癲狂症」嘅暴力城市，三月以來，親中派不斷咒罵民主派候選人支持台獨。漢奸賣國，語無倫次，跟住國家副主席曾慶紅話「中央同民主派之間無矛盾」，點知親中喉舌語言暴力更加升級。有組織有預謀，暴徒對黃成智嘅暴力襲擊，就係代表咗北京同民主派「溝通」嘅「誠意」表現嘞。
加埋對待一個手無寸鐵嘅何偉途，粗暴踐踏人權及私隱，完全罔顧其家人感受。就算真係嫖妓，又使唔使指使組織親中傳媒將佢當殺人犯咁放大晒啲相嚟瘋狂人身攻擊？呢啲唔係精神分裂症嘅表現又係乜嘢？
惡勢力如此橫行，香港嘅社會生態受到污染，只有靠市民延續7.1精神，齊齊證明邪不能勝正，聽日投票，當做正義力量嘅公投，作出良心嘅裁決！
傳真︰2623-9278
電郵︰