前晚有匿名人士打電話去報館，話有台灣幫策劃喺噚日綁架Twins，兩位成員蔡卓妍（阿Sa）同鍾欣桐（阿嬌）噚日就照常開工，而英皇特登請咗四個保安，但追訪佢哋嘅記者有成二十幾個，採訪車都有十部，傳媒反而成為最強大嘅保安隊，所以原本負責Twins安全嘅實Q哥哥惟有負責開路、攔記者同埋攞行李啦。
Twins噚日分頭開工，阿Sa喺中環一間餐廳影相後，就搭飛機北上拍攝劇集《家有寶貝》，阿Sa全程笑騎騎，對於呢單綁架鬧劇，阿Sa話：「寧可信其有，不可信其無，但呢啲都係惡作劇居多。」
至於阿嬌噚日就面青青咁出現，佢同樣喺助手同兩名保安員陪同下去開工，佢喺灣仔一間電影公司傾嘢，之後就去咗海洋公園拍《精武世家》，阿嬌話唔擔心綁架，而導演馮德倫重話有袁和平同成班武師喺度，阿嬌梗係唔使驚。
其實如果有人打Twins主意，根本就唔會事先張揚，唱片公司為安全計，加強保安係好應該，不過馮仁昭都希望啲人唔好搞咁多惡作劇，無謂令藝人增添壓力。
至於與Twins同公司嘅Yumiko，噚日喺新伊館出席活動時就話：「可能啲人覺得佢哋好有錢，我覺得可以叫老闆楊生提供保鑣。我就唔需要，因為我冇錢，而且一個人住，綁咗我都冇人會畀到錢。」
而組合Boy'Z嘅Steven就話可以保護Twins，佢話：「我哋兩個人一人幫佢哋擋一刀都得。」Kenny亦話：「話晒係佢哋帶我哋出身，兩囗插刀。」
盧巧音前日喺馬來西亞同當地傳媒講，話期待有一首可以超越《好心分手》嘅K歌，佢話覺得好歌除咗要配合天時地利同人和之外，重要靠緋聞先得，盧巧音咁講即係承認佢同余文樂嘅一段情，幫咗佢呢隻歌？嗰陣佢提起余文樂都咬牙切齒，莫非又係劇情需要？
王傑同宣萱噚日喺尖沙嘴拍攝《老婆大人》外景，對於日前容祖兒一班歌手喺《奧運金牌精英大匯演》中夾嘴形唱歌，王傑話：「可能當時狀態唔好，而且大球場回音大啫。」王傑又話嚟緊佢會返北京開演唱會。
張曼玉（Maggie）以Olay大中華區代言人身份，早前到東南亞拍攝新一輯電視廣告，廣告商特別安排成組拍攝隊伍飛去當地同佢會合。
Maggie雖然在烈日下拍廣告，但心情甚佳，除不時用自備嘅DV機拍攝花絮外，重義務充當繙譯員，用廣東話、英語同法語為嚟自香港嘅化妝隊伍、法籍導演同Olay要員作三語傳譯。
陳百祥（阿叻）前晚出席香港足球總會90周年紀念晚宴，對於日前做奧運騷時因為國語唔好被批評，佢話：「我講得唔差，因為我一啲都唔識，其實我根本唔使講，無綫安排李浩林同利嘉兒嚟講，我係主帥壓場嘅，不過現場大家聽唔到對方講嘢，我先講幾句，唔係搶嘢講。我今次只收利是，所以冇壓力。」
