金像女星妮歌潔曼（NicoleKidman），大前日出席威尼斯影展為佢部爭議性新片《Birth》造勢嗰陣，俾經典影星堪富利保加（HumphreyBogart）嘅遺孀羅蓮柏歌（LaurenBacall）揶揄佢只係個影壇初哥，未有資格成為「傳奇」，令妮歌極為尷尬。不過，二人前日去到法國多維爾為套片宣傳嗰陣，突然變得非常老友，重喺傳媒面前互咀㖭。
妮歌前日由意大利威尼斯去咗法國多維爾繼續為新片《Birth》宣傳，佢喺出席首映同記者會嗰陣，先後換上兩套服裝出現，非常之尊重個場合。經驗豐富嘅妮歌唔想搞衰個宣傳行程，所以即使佢大前日俾同片扮演佢阿媽嘅羅蓮姨彈佢只係影壇初哥，前日妮歌都照樣同羅蓮姨一齊做宣傳，冇話面左左。
之後佢哋行紅地氈嗰陣就猶如母女咁，妮歌一路拖住羅蓮姨嘅玉手入場，兩人又喺記者同影迷面前溫馨親吻。無論妮歌係唔係影壇嘅「傳奇」，但我大口羅拉就真係覺得佢相當好戲囉！