點解要投票？理由有好多，人人都有不同理由，最大最大嘅理由就係表達一種意識，我哋係自由人，我哋識得選擇，我哋希望將來有更多選擇權，將無能議員掃走。
民主是否萬靈丹？民主當然不是萬靈丹，從來冇人講過民主係萬靈丹咁低B。邱吉爾話過，民主係一個壞制度，但所有其他制度比民主制度更壞。有民主制度，可能拖慢效率，未必帶動經濟增長，失業問題仍然揮之不去。但有民主制度，先至可以保障言論自由，新聞不受管制。有新聞言論自由，就唔會發生文革事件，三大中國乒乓球手傅其芳、姜永寧、容國團唔會自殺。
民主是否為我哋帶來更多奧運金牌？唔會。印度嘅奧運成績好差，加拿大亦然。民主制度下，人民可有自由選擇；攞奧運金牌係莫大榮譽，但未必值得咁高成本、咁大犧牲。加拿大一位律師樓女文員自費往雅典參賽，得到單車金牌，攞完立即返加拿大銷假上班，冇政府獎金，冇大商家獎金，佢將來唔會好似楊傳廣咁樣，到現在仍然埋怨政府畀錢佢畀得少，呢位女士係最了不起嘅金牌得主。民主投票不是為了奧運金牌，是為了保證人人有選擇的自由，如加拿大女運動員。
立法會冇料到，唔使投票。錯，立法會代表民意，即使功能組別議員都受到民意壓力。愈多人投票，民意愈容易得到反映，立法會嘅作用愈大。爭取民主有一個過程，每一步都不能放棄，行咗一步就爭取下一步，永遠唔郁唔投票，就愈俾人睇死，冇得爭取。
明日投票，意義重大，所謂千里之行，始於足下，為咗爭取雙普選，明日一定要去投票，凡係參加過七一大遊行嘅，明日點可以唔投票，為民主、為爭取普選，請舉家出動，投下神聖一票。