近日港股淡友果然唔易做，恒指噚日跌至12865已經跌唔落，早市追買恒指P輪多數要損手，反而見個市跌唔落買恒指C輪有錢贏，由此可以印證逆勢炒股非智者所為，經常偷雞唔到蝕袋米。
中移動C輪：大市拗腰成功主要係好友出王牌，滙控（005）及中移動（941）「雙天」一出，淡友即無計可施。中移動成為噚日升市火車頭，收23.25元，升1.5%。正股升咁多，中移動C輪隻隻生猛，睇勢正股下個禮拜重有得去，如果升得穿本周高位23.60元，有機會試一試24元，中移動C輪可乘勢炒一轉，9907值考慮。
9907係熱門當炒輪之一，數據合理，有值博率。隻輪屬價內輪，行使價22元，04年11月1日到期，溢價2.3%，槓桿率13倍（有效9.2倍），引伸波幅30.2%。隻輪噚日電腦判收0.179元，但最尾有人追貨，最後一手40萬份掃上0.182元。
下周一港股點走，唔多唔少都要睇吓外圍美股表現。中移動就比較易睇，如果見守得住10日線23.15元，不妨買些少9907短炒，正股升唔穿22.60元，9907可先計數，升得穿嘅話，就可以揸住睇正股試24元。
另一方面，如果下周一中移動一開波就插穿23.15元，中移動C輪暫時唔好掂，等正股守穩22.70元再諗。
章盛