日本性感女星井上和香，雖然拍親寫真都出盡法寶，趴地彎腰樣樣做齊，不過始終少咗啲活力。所以早排佢幫日本漫畫雜誌《YoungMagazine》拍寫真時，搞搞新意思，又游水又打排球，一於展現佢充滿活力嘅一面。
平日多數只係着三點式拍寫真嘅井上，當日難得有機會落水一展身手，特別換上咗套平日難得一見、款式超保守嘅一件頭泳衣，佢重戴埋泳帽同埋一副cute到爆嘅粉紅色泳鏡，成副戰鬥格咁落水。咪睇井上身材咁澎湃，就以為佢游起水上嚟一定會好吃力，但事實上並唔係咁，井上一落到水就好似日本蛙王北島康介上身咁，游得鬼咁快，絕對係有姿勢有實際。另外，井上重話佢最近對滑浪好有興趣，有機會都好想試吓玩喎。
游完水冇耐，轉個頭井上又換上一身排球裝，變身做東洋魔女向大家展示排球技藝。井上話佢讀書時，經常都會喺放學後約埋一班同學一齊打排球，所以扣殺同攔網絕對難唔倒佢。