白鴿黨候選人何偉途呢鋪真係害己害人害街坊，既然已經報咗名參選，重斗膽返祖國風流，俾公安當場捉到，重要向老婆講一套，重要搞到肥仔明亂發炮，真係罪不可恕，有人開始懷疑佢係咪無間道，想害死白鴿黨。
不過，睇埋公安前日嘅記者會，你又不禁同情佢嘅遭遇。就算真係叫雞，佢老哥已經坦白交代，又接受勞教，你東莞公安可以繼續按你嘅規定，扣足佢六個月，點可以又忽然高調開記者會，將啲「吾不欲觀之」嘅相片公之於世，手法簡直卑鄙不要得，東莞公安為證明自己正確，實行置何偉途嘅個人尊嚴及家人感受不顧，係完全不文明嘅做法，若果話係冇政治目的，真係搵鬼信喇。
人權監察嘅羅沃啟講得好，東莞公安嘅做法直情係侵犯私隱，好離譜。當然你去問單親協會，佢哋梗係不齒身為區議員去嫖妓，認為唔尊重女性，而且辜負市民期望。但係何偉途犯事係一回事，大陸公安今次實在太過份啦。所以大眾睇到驚心之餘，唔想香港他日出現同樣情況，就要珍惜你手上一票。
世界唔同咗，醜事可以變好事，某啲人嘅醜事可以變成其他人嘅美事。何偉途涉嫌嫖娼嘅醜聞，明明冇乜突破性發展，東莞公安都可以好似包公審烏盆咁「重組案情」，甚麼「震據確鑿」、「一而最、最而生」，真係難為公安局嗰位發言人，講埋晒啲三級嘢都重要扮晒義正詞嚴。
利益所在，真係做乜都得。同東莞公安一樣穢物當補品嘅重有美國嘅前白宮見習員肥溫，呢位以曾經同美國前總統克林頓有染為榮嘅奇女子，將會喺下月訪港。聽聞肥溫重會訪問北京、上海等地，宣傳佢嘅自傳《Monica'sStory》，內地傳媒爭相專訪，肥溫索價七百八十萬。正所謂，好醜命生成，何偉途喺東莞嘅紅顏知己，唔係鬼婆，就冇咁嘅命嘞。
傳真︰2623-9278
電郵︰