立法會選舉期臨近，已自動當選出任來屆金融界代表議員嘅東亞銀行主席兼行政總裁李國寶，唔使辛苦去拉票，噚日以獨立非執行董事身份出席維他奶股東會後，被記者追問會否投票？Baby笑笑口講，自己剛好周日在港不必出差，一定會盡選民義務投票，不過就點都唔肯透露心水人選，只話今次幾好，除咗可以喺港島區投票，重可以投埋IT界。
佢老哥又自爆投完票後，就會飛去美國見幾個人，咁神秘，記者一於同佢開吓玩笑，問佢係唔係見格林斯潘？此刻剛好有「𨋢」到，正是大好溜走機會，於是呢個國寶笑住留下一句「唔係」，就閃咗。
講開銀行，今年馬會同滙豐合作，喺未來三個馬季，滙豐將贊助一項名為「滙豐卓越理財精英班賽事」，全季共分五場進行，每場獎金高達二百萬，每場賽事騎師同練馬師都會計分，總分最高嘅騎練可以獲額外二十萬，又幾大手筆。
（圖）李國寶話一定會盡選民義務投票。
傳真︰2623-9278
電郵︰