地產多聲道:<br>上舞台九倉造勢長實擺擂台搶客

地產多聲道:
上舞台九倉造勢長實擺擂台搶客

深井碧堤半島二期開售一觸即發。九倉今晚搞個意式風情醉人夜,為樓盤銷售揭開序幕,請嚟新晉女歌手薛凱琪以及女藝人戴夢夢表演。除咗有歌聽,又有意國舞蹈、抽獎與品嘗美酒,代理重可以帶客睇示範單位,順道開單做生意,一舉數得。
與此同時,無論邊區有盤開,都鍾意趁吓熱鬧嘅長實,見深井賣樓,老遠嘅東涌悅濤軒,都部署截擊。中環示範單位,今晚延長開放到十一點,又有深宵專車停喺深井,接送青山公路居民買樓,重有額外優惠及付款安排。
長實列舉悅濤軒十大優點,例如有地鐵、規模大、有露台等等。長實郭子威重話,同深井某樓盤比較,全部都好過晒,長實劉啟文手持嘅傳單,更加寫到明「歡迎比試」,擺晒擂台。

長沙灣地皮中電標售
市區地皮有價,中電趁地產市道暢旺,暗標出售長沙灣青山道三○五號商住地皮,七千二呎,可重建至六萬五呎,估計市值億六。
幅地皮本來只係電站,因規劃為商住用途,中電可以較高價值出售。據悉,由世邦魏理仕招標,下月二十日截標。
蘭西記得,中電早年標售何文田宿舍地皮,由嘉里奪得,發展為豪宅。

小春賣樓賺540萬
歌星陳小春,以千五萬沽出住咗四年嘅大埔康樂園,勁賺五百四十萬。
佢二○○○年以九百六十萬買入呢個一街雙號屋,三千一呎,現以每呎四千八賣畀區內廠家,比四年前高六成。
至於會唔會收番租出嘅跑馬地豐和苑單位自住,代理話應該唔會嘞,因為放緊盤,叫價八百五十萬。
蘭西
電郵地址:[email protected]

戴夢夢今晚現身碧堤售樓處獻藝。

小春趁市旺,低調放售康樂園同跑馬地豪宅。

康樂園