前晚踢過多場世界盃外圍賽，戰果例牌有熱有冷；最令人有印象嘅未必係幾場直播賽事，可能係西班牙及瑞典兩支歐洲勁旅大熱倒灶，齊齊贏唔出而令唔少過關波飛斷纜！
西班牙一直被喻為人腳極盛，不乏天才球星，重係近年球會級歐洲盃賽主宰者；但呢晚佢哋作客鬥可謂只有三流實力嘅波斯尼亞，竟然只打和一比一！上周五佢哋主場鬥蘇格蘭嘅友賽已幾乎累死上盤客，好彩場波踢踢吓腰斬有得回水；但呢次再贏唔到實力較次嘅對手，無得再抵賴，抵鬧就有份。
另邊廂上仗着晒火咁作客大勝馬耳他七比○嘅瑞典，呢晚對手雖係實力較佳嘅克羅地亞，但瑞典主場都要輸○比一，表現咁飄忽，又係抵鬧！
打得又唱得嘅奧尼爾最近出咗隻新嘅rapCD叫「HotInHerePartFive」。裏面有一首歌擺明寸佢嘅前湖人隊友拜恩，話高比仔永遠都唔及得佢，就算𠵱家被迫走，佢仍然係一哥。睇嚟巨無霸對於被迫離開湖人一事仍然耿耿於懷，下季佢哋兩個碰頭時肯定有好戲睇囉！
日本喺前晚作客足球風氣不及板球咁盛行嘅印度踢世界盃亞洲區外圍賽，竟然有成十幾萬人入場觀戰，唔通送叉燒飯？其實係多得日本教練薛高嘅魅力，因過往印度球迷極少接觸到球壇巨星級人馬，所以呢次入場嘅球迷除捧主隊之外，更多嘅可能係捧「白比利」場。
羅馬有唔少成日鬧情緒嘅球員，所以我求大俠一直擔心新教練禾拉唔能夠駕馭佢哋。果然前日卡斯辛奴練波時同助教發生爭執，突然發脾氣走返更衣室，禾拉喺場邊就只得好無奈。意甲未開波已發生件咁嘅事，只係序幕，預計開波後，禾拉要面對更多類似事件……唉。
國足前晚世盃外圍賽僅贏馬來西亞一球，教練阿里漢當然唔滿意球隊表現，球迷唔知嘅話重以為黃衫先係中國，亦暴露國足攻力不足問題。我求大俠聽聞阿里漢解散國足後，會飛去比利時睇仍未向國青歸隊嘅董方卓表現，似乎阿里漢認真考慮提前升呢位曼聯借將做大國腳。