小雲自內地來港，已有十幾年，前年因工作關係，長駐北京，於是索性在北京買樓，成家搬上去，個女喺北京名校讀書，點知安樂咗半年之後，公司換咗老闆，佢俾新老闆調返嚟香港，惟有嘆一句造物弄人。不過佢太太話北京生活費便宜，女兒間學校夠巴閉，諗起返嚟香港撲學校就頭痛，居然唔肯返香港。小雲惟有逢周末就飛北京會妻。
香港選立法會議員，九月十二日就投票。咁啱呢日中午時分去占美廚房食晏之時，喺馬莎百貨門口碰到小雲，對面有人大聲拉票。於是問小雲：「就嚟投票，有何諗法？」小雲話：「以我嘅背景，唔想支持泛民主派，但啲保皇黨爭唔落，所以想支持中立人士。但昨晚睇電視選舉論壇，一位貌似中立嘅女士居然話喺六四事件之中，你哋人人同情學生、學生家長，試問有冇人諗過死咗嘅解放軍，同情吓佢哋呀？當時我食緊飯，聽到我幾乎連啖飯都嘔埋出嚟。𠵱家真係唔知點投票，索性返北京慰妻算數，一於唔玩。」
可惜也，人人去咗上海北京度周末，投票率咪會低晒。各位大佬大姐，不如留番喺香港，齊齊去投票！至於投票畀邊個，大家可以諗真啲，但係去投票就唔使諗啦，星期日由朝到晚，唔使返工，冇理由搵唔到半個小時去投票站投票啫。
入到占美廚房，立即俾人叫住，好久不見嘅建築H開口就講政治：「泛民主派會唔會得到過半數議席？」當然話畀佢聽：「唔會！」一啲商界人士最近唔知係唔係睇到民建聯個巴士廣告︱︱癱瘓香港，驚住泛民主派控制立法會，癱瘓香港，真係杞人憂天，民建聯有咁多隱藏鐵票，假如贊成民主嘅人士掛住飲茶，唔去投票嘅話，民建聯控制立法會都唔奇。