乘住電影《生化危機：殲滅生還者》快將公映，CAPCOM夾番時間推出《BiohazardOutbreak:File2》幫大家熱身，務求再次推起「生化熱」。跟上集一樣，大量隱藏服裝及相片，都要靠賺取分數嚟交易，玩一次肯定攞唔晒，而且所費不菲，一張人物相要成500pt，連埋敵人過百張相已經難儲，加埋8個人物嘅服裝、SPItem及隱藏元素，簡直係天價，交易完後重唔變屍人？
記者：徐影龍
遠在DreamCast年代嘅《聖女密碼》開始，CAPCOM已引入轉換拍檔操縱概念落《Biohazard》系列，由於反應及口碑理想，故一直都有為新作大幅改良拍檔系統，最成功可算係近期GC嘅《Biohazard0》。而真正發揚光大者，正係上集PS2《BiohazardOutbreak》，單機玩時要拖多兩丁友爆機，交換道具頭痛到爆，相反幾個人齊齊上網，各自扮演唔同角色，合力搵道具解謎兼殺敵，易玩得多兼比一味儲LV嘅RPG類更能發揮合作精神。
可幸的是，《Biohazard:OutbreakFile2》對應舊作Save（下簡《Biohazard：File2》），之前辛苦搵埋嘅服裝全部用得番。今集起初共分五個章節，完成後便會出現最後一關「突破」，若然未玩過舊作嘅話，就要由第一關「初心」開始，以熟習所有操作及跟同伴交流。
兩集玩法大致上一樣，周圍搵道具過關之餘，亦要確保自己及同伴免受喪屍襲擊，雖然筆者暫時仍未遇到俾一大堆喪屍圍「𡁻」嘅兇險，不過「初心」後嘅「咆哮」，喺動物園入面將首度出現「喪屍大象」，其噸位比歷代《Biohazard》嘅首腦重要巨大，兼且不斷喺動物園橫行，體力超高兼且失驚無神喺窗邊偷襲，都幾麻煩。
故事承接上集，故操控人物同樣係嗰8個人，改變地方係今集可自由配搭同伴。8名角色各有優劣之處，由行動速度到攻擊都不盡相同，而且每人重有一招特殊技，如警官Kevin會使出腳踢後衝撞、記者Alyssa有強力電槍等，各有所長，唔怕網上玩家獨沽一味玩同一角色。
由於《Biohazard:File2》網絡伺服器噚日先正式啟用，故此早咗買Game嘅機迷大多玩住單機版先。Offline同Online最大分別，主要係參與人數嘅分別，單機玩時主角連同伴共三人，而Online則最多可四人同玩。而單機難度在於同時操控三個人物，每人道具上限只得四個，淨係換道具已經搞到雞手鴨腳，莫講遇着大批喪屍喪狗時嘅狼狽情形。Online玩則靈活得多，四個人分頭搵食，有默契嘅話，尋找道具及共同殺敵都輕鬆得多。
遊戲類型：動作+解謎
對應機種：PS2
遊玩人數：1人
（支援Online）
行貨售價：$418
開發商：CAPCOM
(C)CAPCOMCO.,LTD.2004ALLRIGHTSRESERVED.
可能有唔少機迷冇預訂《biohazard:File2》而錯過隻《DevilMayCry3》體驗版，不過唔緊要喇，《蘋果》送張大海報過你補數！香港CAPCOM專誠預留50張《biohazard:File2》特大海報畀大家，只要手持今日本版，到灣仔DreamStore就有機會免費換領，當然係數量有限，先到先得喇！
換領點：DreamStore（25753285）
地址：灣仔東方188商場256號舖
