最近中國奧運金牌選手到港掀起熱潮，除咗一大班香港市民想一睹佢哋嘅風采之外，亦都有唔少娛樂公司想打佢哋主意，好似就有傳英皇會以重金一千萬同田亮簽三年合約。
噚日英皇集團嘅老闆楊受成出席一個活動時，就回應話現階段係由霍汶希接洽田亮，大約三至四星期就會知道答案。
但據馮仁昭所了解，田亮如果真係要加入娛樂圈，佢就一定要離開國家隊，不過國家用咗咁多錢栽培一個運動員，根本唔會咁輕易放人，同埋田亮近排接受傳媒訪問時都話○八年會繼續參加奧運，咁樣佢根本冇可能入娛樂圈啦。
此外，前日蛙后羅雪娟同體操選手滕海濱去咗表行，二人都獲贈一隻浪琴表。之後佢兩個就去SK-Ⅱ美容學院買化妝品，羅雪娟花咗二萬幾蚊買護膚品，滕海濱亦都使咗八千幾蚊，佢哋兩人所到之處都有唔少職員爭相合照同攞簽名，就連交通警都咁做，可見佢哋係幾咁受歡迎。
新人郭芯其噚日去尖沙嘴出席一個纖體代言人簽約儀式，而恒藝珠寶更贊助咗千萬珠寶畀佢，所以要出動四個保安在場看守住。郭芯其喺記者會上表明為咗報答公司嘅栽培，喺未來五年之內都唔會拍拖，佢話覺得自己一心唔可以二用，所以佢一定會選擇以工作為先。
馬德鐘（Joe）近期不斷為非牟利團體拍宣傳片，佢先後拍過郵政、選舉事務處同扶康會宣傳片，唔知係咪阿Joe個樣夠正氣，所以最近又再被邀請為職業安全健康局拍攝一個名為「密閉空間」嘅宣傳短片。日前佢就去到深水埗嘅污水處理廠取景，而呢段片將會由職安局錄製成VCD，免費派畀各單位嘅工人，希望提高大家對安全嘅關注。
吳浩康（阿Deep）噚日出席喺美麗華酒店舉行嘅《二零零四中國武術交流發佈會》活動，阿Deep被委任為武術推廣大使，重即場斟茶畀國家總教練管健民拜師，不過管健民不但唔肯坐低接受阿Deep斟茶，就算之後接過杯茶都冇飲過，問阿Deep覺唔覺得人哋唔想收佢為徒，佢就話：「咁都重唔收？雖然冇飲，但係都接受咗杯茶。」
許冠傑（Sam）近排籌備緊殺入澳門開個唱，噚日個唱主辦商丘亞葵專程去咗澳門睇景，佢睇過澳門旅遊塔嘅露天空地場地後，覺得場地都幾理想，搭咗台之後應該可以坐八千人，不過要等佢同阿Sam開完會，睇埋阿Sam嘅最後決定，至可以落實舉行嘅正式日期同場數。
