安仔怕漏電　千嬅賴聲沙
眾星解釋《大匯演》咪嘴一派胡言

眾歌手各自解釋在《奧運金牌精英大匯演》時咪嘴的理由，花樣百出。許志安稱表演前一日落雨，所以怕觸電；楊千嬅指自己把聲要打開聲針才能唱現場，方力申稱聲帶不適。而容祖兒則是怕場地大有迴響才咪嘴。

許志安、楊千嬅、方力申和容祖兒早前演出《中國人的驕傲——奧運金牌精英大匯演》時咪嘴，引起不少批評，昨日安仔、千嬅和方力申紛紛為咪嘴一事回應，但解釋牽強，令人難以信服。

曾下雨怕舞台濕滑
安仔前晚在九龍灣展貿出席「六壯士開心到跳舞慶功Party」時說：「係呀，嗰日運動員先係主角，觀眾應該唔介意，要睇唱現場就睇我演唱會囉。由於表演前一日落雨，個台又濕又怕漏電，所以前一晚決定咪嘴。」
而千嬅昨日在中環出席護膚品牌Biotherm活動時，聲音沙啞，對於有讀者投訴歌手在《奧運金牌精英大匯演》時演唱咪嘴而顯得不專業，她說：「其他人我唔知，但我把聲咁樣，因為唔可以打太多開聲針，不過當晚我淨係見到啲運動員，冇見過其他歌手，所以唔知其他歌手因為乜嘢原因而冇唱live。」

方力申揀歌有難度
那麼她可有爭相找運動員合照？千嬅笑說：「反而人哋搵我影就有，好似跳水胡佳。我重問佢啲廣東話點解咁好，原來佢係廣東隊，因為我冇乜點睇奧運。」
對於被觀眾投訴咪嘴，有份演出的方力申亦解釋由於聲帶不適，不能唱現場，他昨日出席「建造業安全日啟動儀式」時說：「我嗰日揀嗰隻歌係有啲難度，加上我聲帶同扁桃腺都有事，我先唔可以唱現場，我作為歌手有呢啲病都好影響心情。」
此外，容祖兒經理人霍汶希之前曾表示是因為球場地方太大，所以怕迴聲太大，為確保穩陣，所以祖兒獨唱時咪嘴。