大市第2日回吐，午市跌幅明顯擴大，恒指萬三點失守兼跌穿埋恒指10日線（12975），睇嚟下試12800至12700機會唔細，恒指P輪有機炒轉超短線，其中2117可考慮。
恒指P輪：2117噚日收0.105元，升5%。隻輪屬價內輪，行使價13200，04年12月30日到期，溢價4.1%，槓桿率16.4倍（有效9.1倍），引伸波幅21.4%。
如果恒指回落到12800水平，2117有機會執番15%利潤。
不過，目前港股個勢重係大漲小回格局，逆勢博恒指P輪其實難度好高，玩2117呢類P要轉身非常快，個市一跌唔落，就要急跳車。自問唔識舞雙刀，倒不如賭單邊，候低買恒指C輪勝算會高一籌。
恒指C輪：恒指C輪選擇十分多，9911係熱門選擇之一，噚日收0.175元，跌9.3%。隻輪亦係價內證，行使價12600，04年12月30日到期，溢價3.2%，槓桿率17.2倍（有效10.3倍），引伸波幅21.4%，現時數據都幾合理，若大市跌多一二百點數據當然有變化，到時要與其他C輪比較過至上車。
滙控C輪：藍籌輪要昅實滙控C輪，恒指屬大漲小回格局全因滙控（005）股價看升，未來1年估計重有十幾廿蚊水位，趁回吐收集滙控C輪贏面較大。噚日滙控跌0.50元，收122元，正股再跌多1蚊幾毫，可吼位買9976，輪價0.53元，0.46元附近可上車。
章盛