港股近期在13000水平整固，期指未平倉合約增加至超過11萬張水平，似乎大市正等待消息進行突破，問題係向上炒定係向下炒？前日有人想借地產股配股消息質低港股，噚日又借印尼發生恐怖襲擊事件造淡，令大市跌破13000，收報12942，跌107點，成交131億元。
港股連續兩日跌市，都有頗強的承接力，限制咗恒指的跌幅，反映好友實力頗強，好友似在等十一國慶中央又有挺港好消息。零售股噚日已經逆市先行炒上，其中謝瑞麟（417）升9.2%、景福（280）升7.4%、六福（590）升5.4%、恒豐金（870）升3.7%、莎莎（178）同卓悅（653）亦分別炒高5.5%及4.5%。
噚日港股沽空增加，達4.54億元，其中和黃（013）佔24.5%，股價偏軟跌1.21%至61.25元。近日市況反覆，市場對和黃分拆環球2G電訊業務上市計劃，反應只是一般。保薦人高盛在推介時將其估值定為50億美元，據聞已較先前的估值60億美元有所下調，若因市況反覆而調低發售價，將令其市值再下調，或多或少會對和黃股價造成壓力。
先科（724）停牌兩個月後，噚日終於復牌。甫開市，股價急挫68%至0.50元，其後進一步跌至0.40元，但成交唔大，唔似係斬倉，股價未跌夠9成就已經有投機買盤承接，急速將股價推回0.75元水平爭持，收報0.79元，跌50%，全日成交達3546萬元。
由隻股平均成交價睇，噚日撈底博反彈獲利有限。由於公司管理層出事，唔知公司有冇內傷，投資者應趁家陣重有投機買盤肯接貨，考慮沽貨走人。
阿虎