若之前有預訂《biohazard:File2》嘅話，就有機會攞埋呢隻《DevilMayCry3》體驗版（下簡《DMC3》）。試玩內容頗為豐富，除開場三分幾鐘嘅CGOpening外，重收錄首兩關Mission，牽涉劇情雖然唔多，不過廠方主要係預告畀機迷知，今集主角Dante嘅孖生大佬Vergil將以奸角姿態登場，同埋畫面強化幅度有幾勁，全3D背景及一堆敵人出現，都無損畫質及流暢度，絕對比《鬼武者3》更進一步。
對比《生化》及《鬼武者》系列，《DMC》系列無疑偏向動作元素多過解謎，廠方亦刻意加入唔少動作元素。新作仍以多個Mission串起整個故事，而每個Mission之前可自由揀選新增嘅三大動作風格，包括以移動技為主嘅TrickSter、以劍技為主嘅SwordMaster及槍技為主嘅GunSlinger，各有不同技能，配搭得宜重可創出精采連技。喺Mission1開頭，就以RealTime動畫形式，展示瀟灑哥Dante嘅帥氣殺敵，簡直堪稱型、英、帥、靚、正！
