黃秋生、余文樂和陳冠希前日到日本出席《無間道II》首映禮。秋生除獲一班熱情的fans以廣東話喊「生日快樂」，更獲女新人加藤羅莎獻花，難怪秋生風騷地說：「若我後生二十年同單身，我一定會娶佢。」
黃秋生、余文樂和陳冠希（Edison），前日一同到日本東京新橋YakurutoHall出席電影《無間道II》的首映禮，吸引不少fans及記者到場支持。三人甫出現即以日語向大家問好，大冧fans，隨即惹來一陣歡呼尖叫及拍掌聲。
本月是秋生的生日，fans亦相當識做，預早學會一句廣東話，前日向秋生大喊「生日快樂」，逗得秋生開心不已。
在首映禮尾聲，新力公司的靚女新人加藤羅莎獻花給三位男主角，三位被問到對加藤的感覺時，秋生即笑說：「佢好靚，若我後生二十年同單身，我一定會娶佢為妻。」而樂仔與Edison均覺得加藤親切有禮，有美女送花都感到好開心。
最後問及三位對日本的感覺時，他們均對日本充滿好感，秋生說：「我覺得日本係個好乾淨嘅國家，女仔又靚，食物又好味。之前喺拍攝《頭文字D》時，重買咗好多合適嘅衫，返到香港都提唔起勁去shopping。」
而樂仔表示自己也十分喜歡日本，他說：「我覺得呢度嘅人好有禮貌。」Edison則說：「我每個月都會最少去日本一次。」