雖然大市繼續回落，地產股受批股陰影仍然腳軟，但炒家冇得炒唔安樂，輪到零售股接力成為熱炒對象，謝瑞麟（417）、Joyce（647）同埋寶光（084）等皆錄得不俗升幅。
經紀黃就情有所鍾，仍然睇好永旺百貨（984），事緣大陸首次向外資連鎖店授權成立全資零售附屬公司，而永旺係其中獲批嘅公司之一，永旺噚日大鑼大鼓，講明日後會在大陸開設最多100間分店，呢個概念，相信芬佬應會受落，加上日式管理嘅百貨公司，向來都備受好評，現時大部份零售股PE炒到好高，都係以公司管理質素行先穩陣。
永旺噚日升幅唔算多，最高見過6.95元，收6.85元，升2.2%，成交金額229.94萬元。
另外，先科國際（724）噚日發出通告，話公司主席被廉記拘捕唔關公司事。先科噚日復牌大插，最低見0.40元，收0.79元，跌50%，成交金額3546萬元。
經紀陳話，不宜將先科與南海石油（076）相比，唔好諗住股價可以大反彈，皆因先科停牌前批過幾次股，睇怕噚日仍未沽完。
慕容小初