連串有組織、有預謀嘅抹黑大攻勢之下，選民游離票數增加，有三成多嘅選民，收到所謂民意調查卷，都拒絕表露意向，有啲就話投唔投票都未決定。
投邊個候選人票，其實亦係私隱，到時入票箱打個交叉，天知地知，亦毋須向任何人交代。鋪天蓋地嘅抹黑行動，要喺一個唔成熟嘅社會，先至有震撼嘅效果。
一個民智開化嘅社會，公民睇嘅係大方向、大原則、大格局，例如美國總統布殊，上屆競選，夠一樣俾人話佢鍾意飲酒開快車，但因為佢抗擊邪惡軸心嘅強硬立場，得到好多選民認同，所以贏咗大選。
而喺白宮同女見習生有染嘅克林頓，亦因為刺激經濟有功，臨落台宣布支持民主黨副總統戈爾，結果啲選民亦紛紛認同佢嘅風流，導致戈爾嘅選民得票，反為重高過布殊。
講近啲，日本首相小泉純一郎，近日亦傳出曾經同一名藝伎有地下情，但由於小泉純一郎堅定捍衞日本利益，深得大和民族擁戴，亦唔見有人因此而倒閣。
祖國大地繁榮娼盛，中央屢次掃黃，次次虎頭蛇尾，珠三角度度都係妓女，呢停罪惡腐敗嘅有中國特色嘅資本主義制度，日日都引人犯罪。人民政府肅娼無力，反為將個別港人不慎受到內地歪風誘惑，中咗祖國妓女糖衣炮彈嘅犧牲品個案，倒果為因，無限上綱，人身攻擊兼無限政治化，若然選民成熟少少，面對呢停鬧劇，自然會明白邊個係罪犯，而會作出合乎人性嘅投票抉擇。
董特首冇去過東莞嫖妓，不過你會唔會投佢票？剩番三日，游離唔緊要，全港選民應該進入三日嘅冷靜期、判斷期、記憶期，從頭諗吓呢兩年來嘅風風雨雨，重溫一下發生過乜嘢事，檢閱一下好多嘴臉，到咗星期日齊齊上街，入票箱，作出良心抉擇！
傳真︰2623-9278
電郵︰