賓架K在外資銀行工作，外資大行鍾意請海外大學畢業生，個個英文都好叻，態度進取，對美國政治經濟頗為熟悉。可惜有一樣嘢唔掂，因為佢哋多數中學時候已經去咗外國，中文程度係有限公司，寫中文完全唔掂，兼且對三司十一局呀、梁錦松呀、大財團呀，都一無所知。賓架K做教車師傅，有時為之氣結，向上頭反映，請番兩三個本地畢業生得唔得呀？上頭話，請「中文人」會請姓Zhang，不請姓Cheung；請姓Deng，唔請姓Tang︱︱即係以內地人為優先，唔識用普通話講生意嘅，免問。
賓架K為之冇符。傳媒T亦知道有此情形，因為佢係回流移民，仔女慣咗講英文，惟有請老師補習中文︱︱學簡體字，講普通話︱︱若非如此，傳媒T好驚仔女大咗之後，冇法子搵到工。佢見到一啲自美加澳回流移民、朋友，紛紛送子女入國際學校，心為之危，久唔久就勸佢哋留意子女學習中文嘅情況。
賓架P就同賓架K相反，佢間銀行以本地及中國業務為主，請畢業生以佢哋對香港及中國嘅認識為主，外國回流學生多數唔合意，一於唔請，多給本地大學生機會。左丁山聽咗，幾乎要代表本地大學多謝佢，希望葉樹堃頒贈佢間銀行一個最佳僱主獎。賓架P奉勸本地學生一定要中英文並重，學好普通話，學習簡體字。其實簡體字並不難學，識繁體字再學簡體字，容易得很。先識簡體字而再學繁體字，難得多咯，睇古書都唔掂。據傳媒T講，上海嘅「優皮士」現在重新「發現」繁體字，以寫得一手好書法（繁體字）為高級休閒活動。香港下一代學中文字，由繁入簡，絕不蝕底。