個市出現回吐，恒指跌86點。調整一下有利後市發展，前日9RSI上到78.4，昨日回落到68.8，冇咁超買，守住萬三大關，再玩過。
聯通C輪：恒指成份股中，最標青嘅係聯通（762），升2.5%，C輪9844由3.8仙彈上5.3仙，升39%，做咗是日輪王。隻輪下月5日最後買賣，行使價7元，溢價15.6%，最後好大機會飲雪水。其他聯通C輪數據冇隻睇得上眼，冇得炒。
電盈C輪：電盈（008）亦係有得逆市升嘅恒指成份股，最高5.25元，收5.20元，升1格。標準Call輪中，9866與9814買賣較活躍，曾經升過十幾巴仙，埋單1隻微跌1隻冇升。9866年底到期，輪價28.5仙，溢價14.5%，槓桿率18.2倍（有效7.1倍），引伸波幅40%。9814長命啲，明年1月到期，輪價58仙，溢價7.1%，槓桿率9.0倍（有效5.6倍），引伸波幅37%。炒輪，不適宜淨係睇住槓桿率，要望吓溢價。睇好正股，揀9814實際好多，有4個月壽命，畀7%溢價唔算離譜，槓桿率9倍可以支持隻輪享有咁嘅溢價。
電盈X輪9762波幅成30%，收6.4仙。上比聯網搵吓料，隻輪溢價2.2%，有效槓桿率7倍。本月24日最後買賣，炒呢隻不如炒9814。
中移動C輪：中移動（941）見過23.60元，收23.25元，跌25仙，若再跌啲，喺低位買C輪，對象係9907或9813。要有心理準備，兩隻輪波動急劇，正股兩三毫子上落，兩隻輪隨時升跌1成。9907交投尤其暢旺，1日成交量佔發行量1半以上。
章盛