黎明係公益金籌募委員會委員，今年公益金「便服日」喺正中秋節舉行，為呼籲市民響應同參與，黎明親自拍攝宣傳短片，噚日就喺中環舉行宣傳片首播儀式。
主辦單位特別安排幾個打扮得好可愛嘅小朋友搞氣氛，黎明應現場記者要求同小朋友合照，當時有兩個細路女着住件馬騮仔衫，黎明好順手咁拉住其中一個馬騮女條尾，點知個女仔就好唔畀面黎天王，一手撥開黎明，原來黎明唔小心掂到人哋個屁股。
黎明覺得好搞笑，猛讚個女仔醒目，佢話：「我當時心諗個女仔好醒目喎，好叻，識得保護自己。」
呢排中國奧運金牌運動員嚟香港，有傳好多人爭同田亮簽歌手合約，原來黎明同田亮嘅經理人好熟，黎明覺得運動員應該做自己鍾意做嘅工作，拍廣告時間短，搵錢快，但拍戲時間長就冇必要。
吳浩康噚日同Boy'Z喺尖沙嘴出席《英皇新秀歌唱大賽2004》記者會，比賽時吳浩康會同班新秀表演，佢哋之前重成班人去咗北京拍片段，吳浩康話：「我到時要唱幾首國語歌，𠵱家搵緊老師惡補，我怕俾人笑唱得太差。」問佢有乜意見畀班新秀，佢話：「珍惜機會囉。」提到容祖兒做奧運騷時咪嘴，吳浩康撐師姐話：「每個人都有唔舒服嘅時候，祖兒點都係唱得之人。」
張惠妹嘅新專輯就嚟推出，佢早幾日用咗十三個鐘頭，拍主打歌《愛是唯一》嘅MV，今次佢話唔行野性路線，改行端莊路線，不過佢喺MV入面，刻意解開白色上衣嘅三粒鈕，露出乳溝同黑色胸圍，重將咪擺喺雙腿中間，似乎仍然係脫離唔到野性同埋性感呢一個層次喎。
梁靜茹噚日舉行新專輯《燕尾蝶》記者會，佢嘅馬來西亞音樂人前男友阿管特別錄咗VCR幫佢打氣，睇到佢眼濕濕，不過佢話自己𠵱家對陶喆充滿幻想，重話：「他很帥、很酷、很棒、很紳士，我幾乎要愛上他了。」至於佢同阿管四年幾嘅戀情，已經冇彎轉，佢話原因係「遠距離戀愛，久了就淡了。」
已故慈善伶王新馬師曾生前開設嘅「楚留香」酒樓，今年四月結業後，遭申請清盤，高等法院聆案官噚日正式頒下清盤令，令經營「楚留香」酒樓嘅楚留香酒家有限公司清盤。
位於筲箕灣嘅楚留香酒樓，由「祥哥」鄧永祥創辦，「祥哥」九七年病逝，將酒樓留給四名子女，係之後觸發四名子女同「祥嫂」洪金梅爭產嘅導火線之一。
案件編號：HCCW869/04
負責介紹日本演員去荷李活演出《藝伎回憶錄》嘅演員介紹公司負責人奈良橋陽子，對於《藝》片入面用得太多中國演員，而且主角重係由章子怡飾演，覺得好不滿，所以有傳佢會同荷李活嗰邊終止合作關係，而承蒙佢介紹演出《最後武士》嘅日本男星渡邊謙，可能會為咗報恩而辭演《藝》片。
