鬧雙胞　小齊口音穿煲
華仔今晚唱滿百場萬人舉杯慶祝

任賢齊前晚出任劉德華演唱會的嘉賓，他戴着華仔樣貌的面具，在安哥時走上台搞鬼，不過觀眾憑着小齊半鹹淡的廣東話識破其身份。而華仔今晚的演唱會，將是他在紅館舉行的第一百場個唱，他會與過萬觀眾一同舉杯慶祝。

劉德華前晚在紅館演唱會上與任賢齊一同向觀眾開玩笑，在安哥時段，小齊戴上面具扮華仔，他穿起開場時華仔着的龍袍，升上台大叫說：「我哋由頭開始過，一個都唔准走！」在場觀眾以為華仔賣大包，其後小齊作勢燃點火圈，卻未能成功，他叫嚷說：「點解冇火？係咪冇畀錢？邊個夠膽唔畀面劉德華？」

自言頂足成晚
由於小齊所講的是半鹹淡廣東話，加上現場亮起大燈，觀眾看到「華仔」只是個戴着面具的人，於是隨即起哄，部份觀眾更估到台上的是任賢齊，於是大叫「小齊」。
小齊聞言脫去面具，並向觀眾說：「係咪我唔係劉德華就冇面畀，所以冇火先？你哋畀我享受多一陣做劉德華嘅感覺喇，其實我已經頂咗佢成晚嘞，你哋唔發覺咩？」引得台下觀眾大笑。
其後華仔上台時，小齊搞笑地說：「你係邊個？你又上嚟扮劉德華呀！」小齊表示本來覺得自己頗弗，但站在華仔身邊即覺得自己是肥仔，他又指華仔是他最「樽」（尊）敬的歌手。

感激小齊支持
華仔亦十分感激小齊捧場，他聲言小齊一知道自己開演唱會，都會趕來支持，而今晚的演唱會對華仔來說特別有意義，因為這是他在紅館舉行的第一百場個唱，據悉會場入口會布置得甚有派對氣氛，而每位入場觀眾均獲贈綠茶一支，安哥時華仔會在場內與過萬觀眾一同舉杯慶祝。