港股噚日先升後回，成交大增到174億元，成個單日轉向格局。恒指中段曾上升54點，但午後掉頭插落，一度落到13000關口，收市13049，跌86點。
國企個勢亦一樣，早段升得都幾急，國指曾高見4489，升82點，結果收4404，跌3點，成交增到46.7億元，比前日增35%，又係單日轉向。
不過，今次升市，個勢唔算好急，且升幅亦唔算大，恒指由12151升到13190，升幅只係8.5%，因此，噚日轉向，可視為短期到頂，調整開始，但幅度唔會大，時間亦唔會長，整固完之後，又再升過，向14000的目標推進。
國企噚日早段急升，主要係大行又再出擊，中鋁（2600）、江銅（358）同馬鋼（323）等，都係主力掃貨對象，最高潮時，升成4%。午後回軟，跟市而已，大行咁樣買法，一定有跟尾，話唔定大市調整期間，國企會接力而上，上文所提的3隻可優先選取；另外，上海石化（338）落後，亦可留意。
靚地勾完一幅又一幅，下月12日拍賣，庫房起碼進帳逾百億元。高資產股仍有強勢表現，大酒店（045）收5.55元，升0.1元，而富豪國際（078）曾搶上0.365元，雖回收0.355元，但逆市企穩，看來新升浪隨時展開。
富豪大翻身，主要係靠赤柱富豪海灣，賣咗三分二，已套現40億元，重有三分一，起碼可以收多35億元。富豪資產膨脹得快，債務重組月底就會搞掂，到時肯定會有好消息。
唔好以為富豪只有一個樓盤，家下樓市轉活，樓價又開始上升，富豪一樣係受惠者。除富豪海灣外，集團在鴨脷洲有一個住宅項目，單位1300個，預期05年落成，獲利亦會好可觀。
富豪已定16日（下周4）派中期成績表，盈利多少，主要係睇入帳方式而定，但04年度（12月年結）全年盈利就肯定好勁。富豪現發行81億股，以保守獲利10億元計，每股盈利12.3仙，現價PE僅2.9倍，就算升上0.5元，PE亦只係4倍！
重有，玩具大王蔡志明入Board做副主席，相信連串大動作將會接踵而來。
郭兆誠