A：「有冇睇大匯演呀？最鍾意邊part？」
B：「梗係劉翔嗰part啦！佢唱歌勁好聽呀！」
A：「係啦，好心大會畀佢獨唱啦。」
B：「我都係咁話，劉翔幾有星味呀，古巨基一拍埋去，即刻黯然失色。」
A：「咁你覺得劉翔似元彪多啲，定係陳庭威？」
B：「講咩呀你？！劉翔靚仔好多。」
A：「係咩？但係佢塊面好多粒粒喎。」
B：「唏！咁先夠man嘛。」
A：「嘩，你使唔使？不過話唔定遲啲會有美容院搵佢做代言人，示範美容前後。又或者SK-II搵佢拍面膜廣告，你第一個仆去買啦。」
B：「梗係！不過唔會啦，大陸管得好嚴嘅，會破壞國家運動員形象嘛。」
A：「咁又未必喎。你有冇發覺劉翔嘅衣着，同其餘49位運動員有咩唔同？」
B：「邊有唔同呀？咪又係嗰套紅白色運動裝！」
A：「係就係，不過其餘49位都要整整齊齊咁拉上拉鍊，係得劉翔一個唔使。」
B：「係喎！怪唔得佢零舍搶鏡啦！但係點解呢？」
A：「我估國家有心捧佢做超級偶像。你知唔知劉翔幾時生日？」
B：「哈！你想考我？7月13日，1983年。」
A：「北京取得2008奧運主辦權嗰日，係2001年7月13日，剛好係劉翔嘅18歲生日。」
B：「咁即係點？」
A：「即係話劉翔與中國體壇地位同步長大成人，即係話劉翔稱得上係中國嘅吉祥物。」