意甲偶像級教練文仙尼今季以高姿態由拉素過檔國際米蘭，唔代表事事順利，好似最近受傷兵問題困擾之餘，拉素會長同球迷當正佢係叛徒，拉素球迷會更發起換T恤大行動，旨在侮辱文仙尼。果然反轉豬肚就係……。
事緣拉素球迷會最近製造咗一批印有「叛徒文仙尼」字句嘅T恤，又四圍呼籲球迷攞以前印有文仙尼個名嘅T恤嚟換。
另外，拉素新會長洛迪圖就話已諮詢法律界人士意見，準備告文仙尼喺同拉素未約滿同時、又未得會方同意下公布自己轉投國米。雙方隨時對簿公堂。
另外，國米禮拜六作客對基爾禾前，正受傷兵（甘馬拉、馬田斯）問題困擾，文仙尼呢期真係有排頭痛。
轉會曼聯嘅朗尼，新居就喺正領隊費格遜屋企附近，相隔只三百米。原來呢個係曼聯會方安排，用意係想費格遜可以時刻昅實朗尼，扶正佢私生活壞習慣。以朗尼爛玩嘅性格，未必會甘心，但相信佢女友一定最歡迎呢個安排，朗尼以後想出去「沙沙滾」都難啦！
董方卓近排喺比利時好紅，場場有士哥，搞到國足青年隊都要特別召佢回國，參加月尾喺大馬舉行嘅亞青賽。難得係安特衞普教練迪普歷重全力支持佢返中國幫國家隊比賽，理由係董方卓非常希望幫國家隊爭取成績。不過，擔心嘅反而係曼聯，驚佢因此加重腰部傷勢喎。
梅度早前返羅馬尼亞備戰世盃外圍賽又再次唔守規矩，喺布加勒斯特街頭飛車，重要唔理交通追截，最後被捕，除罰錢外亦被判停牌三個月。我求大俠都同情梅度，喺車仔無正選位，早前又俾人拍到同影星有染製成光碟出售，搞到同老婆離婚，但飛車減壓會累人累己，隨時……。
因財困降落丙組嘅拿玻里，早前被意大利製片家收購。據講，新老細好希望效法費倫天拿咁閃電升番上意甲，準備四圍招兵買馬，包括想搵前阿特蘭大教練韋華素利執教。意足總亦開方便之門，特准拿玻里喺月底前進行球員買賣。即管睇拿玻里能否成為另一隊「費倫」啦。