港股噚日上午在13100之上窄幅爭持，午後偏軟，一度跌近13000，當時市場傳出有藍籌地產股想批股，加上滙豐證券再次唱淡地產股，叫客戶趁高位沽出，恒指全日收報13049，跌86點，成交達174億元，但最終未見有地產股進行配股。
阿虎四圍打聽究竟邊間藍籌地產想配股，聽到嘅消息係話新世界（017）可能有興趣，但新世界已經冇做藍籌股好耐啦。藍籌地產股中，回吐得最多係恒地（012），跌3.08%至37.70元，其次是剛公布全年業績的恒隆地產（101），收報11.75元，跌2.08%，長實（001）與新地（016）則分別跌1.79%及1.32%。
思捷（330）一向都有大行睇住，繼先前大摩唱好要見39元後，噚日花旗又唱好，話要見44元，思捷逆市升0.27%至37元，睇勢好快會試闖大摩所定嘅目標價。
盈大地產（432）最近從低位反彈，最多累升22%至2.30元，已接近上次的配股價2.65元水平，噚日回吐4.34%至2.20元。黑客話要留意電盈（008）會否減持盈大，Cookie則認為現時豪宅市道較電盈5月初減持盈大時還要好，電盈應該唔會低於2.65元減持盈大，而且咁做會好對唔住上一次配股嘅捧場客。
威靈頓基金（WellingtonManagementCompany）繼早前增持創科（669），噚日又披露增持首都機場（694），由4.84%增至5.07%。咁啱中港噚日宣布達成兩地民航協議，增加每周航班，國泰（293）亦表明會增加更多北京線航班，首都機場自然受惠，好消息接踵而至，後市可看高一線。
阿虎