精明消費：
有膽水壼保溫保冷四季啱用
潮流講求健康生活，近年除興飲花茶外，更愈來愈多人知道飲水對身體的重要性。所以無論喺屋企抑或出外，都會有個水壺喺身邊。市面的水壺愈出愈多功能，既有防漏，又有不易碎的款式，外觀更愈出愈靚。
記者：張穎麟 攝影：陳盛臣
Model：Kiddy
保溫保冷悉隨尊便
市面上的保溫水壺，款式愈出愈多，可見其受歡迎程度。保溫水壺的內膽，主要以不銹鋼及玻璃為主，除可保溫外，亦具保冷功效，而且大部份有效6小時，所以一年四季都合用。
實用有品味
集品味與實用於一身的evasolo保溫水壺，由丹麥兩大著名設計師ClausJensen同HenrikHolbaek合力設計。黑色的流線壺身，容量1.1L，包裹着保溫的不銹鋼內膽，再加上牛角形的橡膠手柄，防熱又防滑。
售價：$680(a)
特大壺口設計
1.5L的保溫水壺，壺口夠晒大，4cm的直徑可以將冰粒直接放入壺中。再加上Thermos獨有的真空斷熱裝置，能有效隔絕壺外溫差的影響，無論保溫定保冷都一樣咁掂。
售價：$279(b)
保溫持久24小時
大部份的保溫水壺都係得6小時保溫效能，但係呢個卓上魔法瓶，就可保持50OC的溫度達一日之久，而保溫70OC亦可達10小時。玻璃內膽，售價經濟抵用，可惜容量只有0.95L。
售價：$39.9(b)
單手操控無問題
用過保溫水壺的朋友都會發覺，一般保溫水壺的開關均設在壺頂，想單手操控，有一定難度。呢個象印的AFFB-10S保溫水壺，1L容量，不銹鋼內膽，開關設於手柄上方，一㩒即可倒水，單手操控夠晒方便。
售價：$288(c)
花花圖案易襯茶具
款式設計比較傳統，玻璃內膽，開關設於壺頂，要先按開關掣才可倒水。不過水壺上的花花圖案，比銀銀黑黑的設計有生氣得多，適合媽咪用來襯茶具，容量有1L。
售價：$118(c)
款新重量輕
Tiger新款保溫水壺，1.34L容量，把開關設於手柄上，方便單手操作之餘，壺嘴亦經過精心設計，容易控制倒水的多少，而且壺身重量夠輕。
售價：$248(c)
耐冷水壺設計大躍進
除了保溫水壺外，可以放入雪櫃的耐冷水壺一樣受歡迎。一般耐冷水壺，容量都有1L以上，最多的更可達2.2L，大家庭都夠飲。再加上耐冷水壺亦不斷加入新功能，除冰種外，更有防漏設計，絕對好用。
有埋茶隔
外形唔算突出，但壺內設有茶隔，可供放茶包、茶葉之用，於保溫水壺中較為罕見。美中不足係開關設於壺頂，單手操控有點困難，玻璃內膽，容量只有0.98L。
售價：$178(c)
保冷至醒
單憑外觀，未必看得出呢個ThermosTPA-1700水壺有保溫功能，其實佢一樣可以將攝氏60OC保持1小時。雖然未及保溫壺標準的6小時，但保冷能力明顯更佳，事關佢可抵受及保冷達-20OC，容量有1.7L。
原價：$120
特價：$79.9(b)
附送兩支冰管
呢個BroccaArtic玻璃水壺，附送兩支冰管，可用來注入冰水或冰粒，然後置於水壺內，讓你在九月的高溫中，也一樣可以一嘗冰涼感覺，容量有1.55L。
售價：$65.9(b)
左扭右扭唔漏水
呢款粉紅色的膠製水壺，突破地採用左右扭的方法開關，無論將管頭扭左定扭右都唔可以倒水，只有扭到正中才可倒水，大大減少漏水的機會，容量達2.2L。
售價：$23(d)
打橫放都得
呢款容量有2.2L的Asvel水壺，採用完全密封設計，無論打直定打橫，甚至倒轉放都點滴不漏。其選用的膠質料亦不會產生茶迹，用極都咁新。水壺耐熱溫度達180OC，耐冷溫度更達-40OC。
售價：$80(e)
雙重鎖扣
呢款Tonbo膠水壺的蓋，經過特別設計，用上左右雙重鎖扣，再加有防漏膠邊，夠晒安全。最正係佢個蓋經過特別設計，保證可將壺內最後幾滴水都可倒出，唔會殘留在壺內，容量有2L，同樣可盛載熱湯。
售價：$75(e)
紅色壺蓋好醒神
呢款容量達2L的膠製水壺，其開關設計比一般水壺特別，只要㩒住壺頂的紅色部份，即可倒水，要將紅色蓋按下才會關閉，同樣可盛載熱湯。
售價：$10(f)
壺蓋有埋日期
極之細心及注重健康的設計，可在頂蓋上Set好日期，等你可以記得幾時將水裝入，唔怕幾個月都唔換一次水。另外，膠壺中預留位置，讓你可在壺內加濾芯或茶隔，容量有1.5L。
原價：$238
特價：$109(g)
輕便款顏色搶鏡
若然想買個水壺，可以放喺公司又或帶出街使用，就要輕便至上。新款的輕便水壺，一樣可以加入冰種，亦備有不易碎質料及易握設計，再襯上型仔外表，大人細路都啱用。
可入微波爐
德國製的簡約玻璃設計，外形夠晒靚仔，1.75L容量，除可放入雪櫃外，還可直接將佢放在電熱板或微波爐加熱，就算入埋洗碗碟機都冇問題，功能遠勝一般水壺。
售價：$340(a)
不易碎膠夠耐用
1.89L容量，壺口的直徑夠大，可將冰塊直接放入壺內。採用不易碎膠製造，就算經過撞擊或唔小心跌落地，都唔會碎裂，相當耐用。
售價：$23(e)
小朋友專用
呢款GripNSip輕便水壺，容量只有0.296L，專為小朋友而設。採用易握設計，就算小朋友手仔細細亦一樣揸得穩妥。
售價：$20(e)
戶外運動好拍檔
非常Sporty的nalgene輕便水壺，唔單止擁有一身搶眼紅色，而且更特設刻度，最方便一邊做運動，一邊留意自己飲咗幾多水。0.75L容量，壺蓋設有窿位，方便掛在背囊上，戶外活動最啱。
售價：$79(e)
防漏不易碎
採用了美國nalgene的防漏設計，再加埋不易碎膠料，乃戶外活動必備。最抵讚係刻度特別明顯，點都睇得清清楚楚，容量有1L。
售價：$86(e)
售賣點
(a)G.O.D28905555
(b)吉之島28846888
(c)崇光百貨28338338
(d)日本城28730110
(e)city'super25062888
(f)吉之島10元廣場34282138
(g)實惠26638833
最齊功能
論牌子未夠nalgene響，不過Rubberrmaid的輕便水壺功能就夠晒齊全，除了有基本的防漏膠邊外，更可以直接放入洗碗碟機，其質料乃不易碎膠，就算雪成冰都唔會爆壺，容量有0.95L。
售價：$59.9(b)
抗震耐碎
台灣製造的Zeazi，聲言選用非常先進的食品級太空玻璃製造，可以做到抗震、耐碎兩大效能，對輕便水壺來說，1L的容量算係巨無霸。
售價：$19.9(b)
經濟抵買
鮮黃色的輕便水壺相當搶眼，水壺表面隱約見到得意的MonKiBiGi馬騮仔圖案，輕便水壺中較為罕見。美中不足係水壺雖然輕身，但卻有點單薄，容量只有0.5L。
售價：$13.9(b)