出道短短一年嘅蘇格蘭四人搖滾樂隊FranzFerdinand，冒起嘅速度快得驚人，佢哋前晚憑住佢哋張同名處女大碟《FranzFerdinand》，喺博彩公司都睇好佢哋嘅情況之下，擊敗一眾強手，以大熱姿態奪得英國樂壇最享負盛名嘅Mercury音樂大獎「年度最佳英國大碟獎」。而英國演員美妮哉花（MinnieDriver）亦都有去捧場。
前晚喺倫敦GrosvenorHouse酒店舉行嘅Mercury音樂大獎能夠咁有江湖地位，因為評判團由音樂界權威人士、記者同音樂人組成，而且係根據歌手嘅才華同創意等元素選出得獎者，唱片嘅銷量反而係其次。所以今年十二個入圍嘅音樂單位包括咗JossStone、Keane、TheStreets同Jamelia等，但係就絕對見唔到大家熟悉嘅KylieMinogue呢啲名字。
FranzFerdinand二月推出大碟以來，作品一直備受各方好評，至今已經喺全球賣咗一百萬張，佢哋今次得獎重可以獲得兩萬鎊（約二十七萬六千港元）獎金作獎勵㖭。
更加巴閉嘅係當晚FranzFerdinand雙喜臨門，攞埋喺皇家歌劇院舉行嘅GQ年度男士頒獎禮嘅「年度樂隊獎」，不過就要辛苦佢哋連踩兩場啫。