樓市好景，吸引唔少新人入行，做地產代理，今年七月，代理行頭共有萬七大軍，比一月唔夠萬五，增近一成六，重係○二年十二月以嚟新高。
各大代理行要為新人搞培訓班，美聯物業噚日為八十個新兵搞迎新營，由董事羅國安傳授開單秘訣。
美記請嚟長實營業經理梁焯鏗，同新世界營業經理黃浩賢做嘉賓，分享銷售經驗。黃浩賢以一名美記新同事，憑幹勁做咗單逾千萬成交，收到十幾萬佣為例，強調代理最緊要係有熱誠。另外，美記又搞角色扮演，由參賽者扮代理，應付客人刁鑽問題，睇吓參賽者點應付。
最近唔少新樓盤入伙，豪宅級數嘅何文田君頤峰係其一。發展商之一信和集團，過去兩個禮拜，先後喺物業宴會廳，宴請地產界同銀行界猛人，齊齊享受晚宴外，當然順道展現物業豪華質素，帶各位睇睇示範單位同會所。
前晚邀請銀行按揭部、地產代理高層，同埋傳媒去參與宴會。上個禮拜邀請分析員同銀行界高層，三場晚宴，都搞得幾有派頭。其實，何文田本身已經係傳統豪宅區，加上區內一幅地皮最近勾出，身價應該重有得升。
九龍城單幢新盤博林軒，發展商請咗間名氣比佢重大嘅公司做物業管理，都算係舊區單幢樓嘅突破。呢間國際級物業管理公司世邦魏理仕，首度進駐非豪宅地段，擔任物業管理。
創新嘅配搭，源自雙方理念相近，希望提供豪宅級數嘅管理同服務畀買家。
魏理仕資產管理服務部董事黃永根話，博林軒除咗地段之外，整體格局同豪宅非常接近，佢哋喺九龍區管理嘅物業，暫時只有九龍塘豪宅，其餘全部喺山頂同南區，豪宅管理公司嘅形象鮮明，今次夠膽入舊區，證明對個盤嘅質素有一定信心。
想得心頭好，又唔想價錢高，係代理發揮效力嘅時候。香港置業區域經理林樹權話，一名來港工作嘅外籍客，好鍾意大潭紅山半島嘅環境，睇啱個洋房單位，但覺得開價月租十萬，貴咗少少。
該行職員就幫個客同業主傾咗一個禮拜，日前深夜三點，送票畀業主，終於獲同意減收五千，呎租三十二個八，比市價平少少。單位為A型屋，二千九呎，四房雙套房，連車房。
紅山半島分層及洋房，𠵱家有二十幾個租盤，月租叫八萬至十二萬。
中原地產分區經理史世德話，一名廠家早前同仔女一齊睇尖沙嘴君臨天下，有見及仔女好鍾意三座C單位，透過中記問盤。
中記聯絡持有一個高層單位嘅大中華證券主席蕭炎坤，傾咗三日，終於達成交易，成交價千六萬。單位逾千四呎，呎價萬一。
蕭炎坤二月用近千四萬購入，今次沽出，賺二百二十八萬，件貨半年升值一成六。
蘭西
電郵地址：
