地產股噚日回軟，市場傳聞有個別地產股想批股，嚇到投資者急急腳沽貨，但唔少二三線地產股剛剛熱身，因此估計地產股只係唞一唞，就會隨時再炒過。
由於大市氣氛轉好，買殼活動又再活躍，好似噚日股價急升14.28%嘅中華城市燃氣（603），早排大股東曾講過可能賣殼畀一位前董事。經紀陳話，聽講單交易會好快成事。
不過，小初對呢單賣殼事件有啲唔明，皆因小初記得中華燃氣嘅大股東喺舊年買入中華燃氣時，同時買入添發慶豐（661），一次過買入兩間公司好夠氣勢，但何解入主中華燃氣以來，乜都未搞過就話唔玩，實在好難令人明白。
至於添發慶豐，即將改名做中國信息資源，之前重公布有唔少交易，睇落好似想大搞，但股價表現就唔多好睇。經紀陳話，呢點其實已經解釋咗好多嘢，總之一切同個錢字有關。
另外，早排炒過一輪，但近排股價表現平平嘅位元堂（897），市場傳聞公司除咗中藥外，近日想沾手地產，聽講重係大手買入嗰種。
慕容小初