近期頻頻亮相嘅前財爺梁錦松，噚日又喺中環同八方巧遇，喺阿松身邊同佢密密斟嘅，正係中銀香港特殊資產部總經理盧重興。咁啱噚日有報道話，阿松將擔任內地第五大銀行交通銀行嘅高職，八方乘機向佢當面求證。
滿面春風嘅阿松，即刻笑笑口咁話：「乜唔係傳我去中行咩？」，八方於是追問，正在全球招聘副總裁嘅中銀香港，有無向佢招手？佢轉向身邊嘅盧重興，話正問緊盧有無位置請佢云云，不過一輪耍太極後，阿松對於是否加入交行或中行嘅傳聞，正式回答話：「完全冇咁嘅事」。
身旁嘅盧重興見八方左測右度，唔知係想畀貼士定係轉而視線，佢話阿松已經做過地方官（即特區政府高官），再做的話，梗係做中央嘅官，反正佢都長駐北京啦。
傳真︰2623-9278
電郵︰